Shillong: Kawei ka longïing jong u bah Samuel Marbaniang bad kong Shida Pathaw kiba sah ha Marngap, East Khasi Hills ka dei kaba ju leh ia ki kam khaïi pateng ia ki mar ki mata Khasi naduh I mei ieid paieid bad ha ka jingiaid lynti, la shimti kylliang sa maki kiba la bteng shuh ia kane ka kam haduh mynta.
Na Mawngap mynshwa, mynta kila ioh ban plie ia ka dukan ha Traw-Marbisu hakhmat ka surok bah Shillong-Nongstoin bad la ai kyrteng kum ka S.L. Marbaniang Enterprise, Traw-Marbisu.
Kane ka longïing ka leh ia ka kam khaïi ia ki tiar Khasi kiba shna hi na kane ka jaka, kum ki khoh, ki kriah, ki shang, ki shylliah, ki mula, ki wait, ki star, ki polo bad kiwei kiwei.
U bah Samuel bad ka kong Shida kila iathuh ba ia ki shang kwai, ki prah, knup, trap la ju wanrah na ka thaiñ Synteiñ ka Mawsynram katba ia ki khoh, Polo, kriah la wanrah na ka thain Wahkhen, Maw-ah, Massar, Laitmawroh, ka thain Pynursla bad 12 shnong ka thain Sohra.
Ia ki star pat la wanrah na ka thain Nongkynrih katba ia u shylliah, la wanrah na thain Rambrai ka West Khasi Hills bad ki mula na thain Bhoi. Ki wait kum ki tari, ki tukri, ki mohkhiew la wanrah na ka thain Mylliem bad kiwei de.
La ju leit thied ia kine ki tiar na iew Laitlyngkot, Mawsynram, Rambrai, na Bhoi ruh bad na kiwei ki jaka ban wan die pat ha katei ka dukan.
Ha kane ka dukan, ki tiar na kylleng ki jaka naduh ki thain riwar, thain rilum, ribhoi bad na ka thain West Khasi kila wan poi lut bad nangne ki briew na kylleng ki jaka kila wan thied bad don kiba ju wan thied nabar jylla ruh.
Ia ki tari, la phah shaduh Mysore ruh namar ba ki nep bha ban ot ban siah jhur.
Kane ka jingtrei jongki ym tang ba ka kyntiew ia ka iing ka sem jongki hynrei ka kyntiew ruh ia ki nongrep ki nongshna ia kine ki tiar ban die ia ki mar ki mata jongki.
Ka longïing kaba die bad pyniaid iew ia ki khoh, kriah, polo, wait, knup, trap bad kiwei
