Shillong: Ka tnad kam pohiing mynta ka sngi ka la iathir bun ki mat kiba iadei ban pynkhlain ia ka jingiada, ka jingshngain jong ki paidbah ka jylla bad ban ialeh pyrshah ia ki kam pyntriem.
Haba pyntip hadien ba la wai ka jingiathir, u symbud myntri rangbah bah Prestone Tynsong ula iathuh ba ka jingialang ka la iathir ban pynkhlain ia ki tnad bapher bapher ha ka tnad pulit kynthup ka Anti Terror Squad (ATS), Anti Narcotic Task Force, ka Anti Infiltration Directorate, ka Cyber Cell, ki ain Criminal laws ba thymmai. Kila iathir ruh halor ka jingtreikam ka Police Headquarter khamtam ki jingeh bad ki jingdonkam.
U la iathuh ba la pynkhlain ruh ia ka tnad Forensic ha kaba la pyllait baroh sha ki district ia ki Mobile Forensic mynta ka sngi.
Haba batai ia ka jingthaw ia ka Anti Terror Squad, ula iathuh ba kane ka kynhun pulit kan peit thik ia ki kam pyntriem ha kaba la ai ruh ka jinghikai kaba biang ia ki.
Na ka liang u DIG uba dei peit ia ka Anti Terror Squad, u Davies R Marak ula ong ba ka jingthaw ia kane, ka dei ruh hadien ba ka sorkar pdeng lyngba ka Home Ministry ka la ai ia ka jingbthah ban don ka tnad kaba peit kyrpang ia ki kam pyntriem. U la ong ba ha kane ka Sqaud ki don ar kynhun, kawei kaba la ai jinghikai ban iakhun ha jaka sor bad kawei pat ban iakhun ha khlaw.
Ha kane ka jingiathir, la don lang u myntri rangbah u Conrad K Sangma, nalor u bah Prestone, ki ophisar ka tnad pulit naduh ka DGP, u Chief secretary, bad kiwei ki ophisar rangbah ka sorkar jylla.
Iathir ka tnad kam pohïing ia ka jingshngain|ka ATS kan iakhun ha sor bad ha khlaw ia ki riew pyntriem
