Shillong: Ka jingiakren ki nonghikai skul Adhoc hapoh ka lama ka Federation of All School Teachers of Meghalaya (FASTOM) kam long kaba seisoh namar ba kam shym la ai kano kano ka jingkular.
Haba kren sha ki lad pathai khubor u Vice President ka FASTOM u bah Sanborn Jungai u la ong ba u myntri ka tnad pule puthi u bah Lahkmen Rymbui ula pynpaw iaka jingsngewnguh ia ka jingnoh synniang ki nonghikai, hynrei ha kaba iadei bad ka jingdawa jongki ban pynhap noh ia ki nonghikai skul Adhoc ha ka Deficit system ne deficit pattern, kam pat lah ban kular eiei.
Ula iathuh ba u myntri ula pyntip ba naduh ba ka sorkar ka la wanrah ia ka Meghalaya Education Grant (MEG), ka la don ka jingai jingmut na ki bor pyniaid skul, ki nonghikai bad ki kynhun bapher bapher halor kane bad ka sorkar ka dang pylleit jingmut kumno ban wanrah ia ka lynti kaba biang eh.
Na ka liang u myntri ula kular ban khot ia ka jingialang hadien ka shuti puja halor kane ka kam.
Lah ban kdew ba ki nonghikai FASTOM kila pyllong ia ka jingiakhih khlem pud ha Madan Malki bad ha Tura naduh hynnin ka sngi ban pynbor ia ka sorkar ba kan pynrung noh ia ki ha ka kyrdan deficit.
Namar bym sngew hun ia ka jingbym lah kular eiei u myntri sorkar, na ka liang ki nonghikai FASTOM kila rai ban bteng beit ia ka jingiakhih khlem pud tad haduh ba ka sorkar kan ai ia ka jubab kaba shai bad kaba hun.
Haba u nongialam u bah Sanborn ula pynsngew ia kane ka jingkren hakhmat ki nonghikai ha madan Malki, na ka liang ki nonghikai naduh ki kynthei bad shynrang kila rah kti ba dei ban bteng beit ia ka jingiakhih.
Shu sngewnguh ka sorkar ia ka synniang | rai bteng iakhih khlem pud ka FASTOM
