Shillong: Ka jingiakren ka sorkar jylla bad ka seng ka seng kalai kamai ka All Khasi Meghalaya Tourist Taxi Association (AKMTTA) ka la shim ia ki katto katne ki rai.
Haba kren sha ki lad pathai khubor, u symbud myntri rangbah uba peit ia ka tnad Transport, u bah Sniawbhalang Dhar ula ong ba ka sorkar kan pule bniah ia ki rukom pyniaid kali kamai na ki jylla ba kynthup ia ka Sikkim, Karnataka bad ka Maharashtra, ban wanrah ban pyntreikam ha kane ka jylla lada ka iahap bad ka lah ban leh kumta.
U bah Sniawbhalang u la ong ba namar ba kane ka kam, ka dei kaba donkam, ka shim por katto katne ia ka sorkar ba kan pynbeit ryngkat ka jingiasyllok bad ki seng kali kamai.
Halor kane, Ka All Khasi Meghalaya Tourist Taxi Association (AKMTTA) ka la sngew hun ia ka jingiakren bad u symbud myntri rangbah ka jylla ba peit ia ka tnad Transport bah Sniawbhalang Dhar.
Ha ka jingialang, la rai ba ia ka Committee kaba la leh da ka tnad Tourism, yn peit noh ka tnad Transport ka jylla hapoh ka jingpeit u bah Sniawbhalang namar ba kane ka kam, ka iadei bad ki kali kamai.
Haba kren sha ki lad pathai khubor, u nongialam ka AKMTTA ula ong ba kan iakynduh biang hadien ar taiew halor kane ka kam, ha kaba na ka liang ka sorkar bad kumjuh na ki seng kali kamai kin iathir ia ki lad ki lynti ban pynbeit ia ka jingdawa jong ki seng kali kamai.
Ka AKMTTA kala dawa ba ka sorkar jylla ka dei ban pyntreikam ia ka rukom treikam kum sha kiwei ki jylla ha kaba ki kali nabar kin shu wan buh briew ha kano kano ka jaka bad ki kali na kane ka jylla pat, kin sa kit pat ia kiba wankai sha ki jaka jngohkai bapher bapher.
Halor ka jaka pynieng kali ha steshon rel bad ha kad liengsuin, ka sorkar ka la tyrwa ban ai jingiarap tangba ka seng AKMTTA kan shong pyrkhat shwa halor kane.
Yn pule shwa ka sorkar ia ka nuksa na Sikkim, Maharashtra, Karnataka
