Shillong: U myntri ka tnad sam jingtip ka sorkar ne ka Directorate of Information and Public Relation (IPR) ka jylla, u bah Lahkmen Rymbui ula ong ba kane ka tnad ka long kumba dang ioh thiah ha kane ka juk Social media.
Mynta ka sngi, u bah Lahkmen ula lum ia ki ophisar kane ka tnad ban wad jingtip bniah ia ka rukom treikam jongka bad kumno ban shim ia ki sienjam ban pynkhlain ia kane ka tnad sam jingtip ka sorkar.
Haba kren hadien ka jingialang, u bah Lahkhem ula ong ba lada peit ia ka page ka IPR ka long kum ka met kaba dang ioh thiah ha kane ka juk social media ha kaba ka jingsam jingtip ka long kaba sted haduh katta katta. U la ong ba ka DIPR ka dei ka tnad kaba donkam bha jong ka sorkar kaban pynbna iar sha ki paidbah ia ki kam ba khraw jong ka sorkar bad kiwei ki jingtip sha u paidbah.
Ha kajuh ka por, ula pynpaw ba u kwah ban pyllong ia kane ka tnad kaba khlain bad kaba larkam bha ban sam ia ki jingtip kiba shisha sha ki paidbah, bad yn sa shim iathir bad ki ophisar ban pynwandur bha ia kane ka tnad.
Ka DIPR ka long kum ka met ba ioh thiah ha kane ka juk social media : Lahkmen
