SHILLONG 15, Jymmang: Ka Voice of the People’s Party (VPP) ka la pynbna ban pynlong ia ka jingiakhih ha ka 17 tarik Jymmang 2023 ha phyllaw ka Additional Secretariat, Shillong hadien ba kam shym la ioh ia ka jubab na ka sorkar ban pynsangeh shwa ia baroh ki jingpynbna thungkam ha ki tnad sorkar tad haduh ba la pynbeit ia ka Roster System.
Ha ka kyrwoh ba la pyllait, u nongaiktien ka VPP u Dr. Batskhem Myrboh u la ong ba na ka daw ka jingmynthi bad leh bym suidniew jong ka sorkar MDA 2.0 ba lam khmat da ka NPP ia ka jingdawa ban pyn sahngeh ia ka jingthungkam katba ym pat lah ban bishar bniah ia ka polisi bhah thungkam bad ka roster system da ka expert committee, ka Party kan pynlong ka jingiakhih da ka ba shu ia shong ha jaka ieng kali hajan Additional Secretariat ha ka 17 tarik Jymmang 2023 naduh ka por 10 baje mynstep haduh 4 baje janmiet.
U la iawer ia baroh ki nongtrei jong ka Party bad ki paidbah ban ia wan sha ka tei ka prokram jingiakhih ba la pynbeit ka Party.