Shillong, Nailur 20: Ki Nongialam Shnong Shnongpdeng, Dawki bad Darang kila kynduh jingeh bha ha kine ki sngi na ka jingkynjah kiba wan kai sha ka thain, bad kane ka la ktah ia ka kamai kajih jong ki nongshong shnong katei ka thain.
Kane ka jingkynjah ki tourist ka dei na ka jingsniew tasam ka surok na Shillong-Pynursla sha Dawki bad sa ka jingiakhih ban khang ia ki kali tourist ka la nang wanrah shuh shuh ka jingduh nong ia ki briew katei ka thain kiba im na ka kam jngohkai.
Ka jingiakhih ka All Khasi Meghalaya Tourist Taxi Association (AKMTTA) ban khang ia ki kali tourist ka la ktah ia ki nongpyniaid kam jngohkai, bad kila kyntu ia ka sorkar ba kan shim khia ban pynbeit ia kane ka jingeh.
U General Secretary ka Dorbar Shnong Shnongpdeng u Bah Dapbor Syngkrem mynta ka sngi 20 tarik Nailur 2025, ula ong ba hadien ka Sohra, ka Shnongpdeng ka dei kawei kaba khring bha ia ki nongwan shangkai pyrthei ha Meghalaya bad ka thain Shnongpdeng, Darang, Dawki West Jaintia Hills, bun ki paidbah ki imja kpoh naka kam Tourism.
Nalor kata u la ong ba man ka sngi ki nongwan kai kim duna ia ka 500 ngut hynrei ha kine ki khyndiat sngi na ka jingkhang ia ki tourist nalor sa ka jingsniew ka surok, tang kawei ka lieng ruh kam iaid shuh ha ka Shnongpdeng.
Ring sti ka kam jngohkai ha thain Riwar ba sniew ka surok, khang kali tourist
