Shillong: Kiba bun ki riew sain pyrthei bad ki paidbah kim mutdur ba u Myntri Rangbah u Conrad K Sangma un pynhap shuki ia ka kong Ampareen Lyngdoh na ka sorkar jongu.
Ka kong Ampareen ka dei ka MLA kaba kham rangbah tam napdeng kiwei pat ki para longkmie ha kane ka sorkar bad baroh ki shim ba kan neh ha ka shuki myntri namar ba u myntri rangbah u lah ban ai bhah khnang iaka kynthei ban don ha ka cabinet jongu.
Hynrei kam long satia kumta. Ryngkat saw ngut kiwei pat ki myntri na ka party NPP kiba shah pynhap shuki, ka kong Ampareen ka ngat lang jrain. Ym lah ban tip ia ka daw wat maka ruh, kam pat tip ka dang sah ha ka umdum namar ba ka shah pynhap shuki kynsan.
Hynrei lehse ka lah ban don kaei re kaei ka daw kaba khraw kaba pyllong ia u Myntri Rangbah ban shim ia kane ka sienjam ban weng noh ia ka na ka kam myntri.
Ym lah ban tip pat namar ba nalor ka kong Ampareen, dang don sa 2 ngut ki kynthei kiba dei ki MLA ka NPP, kawei ka dei ka MLA na Sutnga Saipung ka kong Santa Mary Shylla bad kawei pat ka dei ka Mehtab Chandee Sangma, na Gambegre kaba dei ruh ka kurim u myntri rangbah ka jylla, ha kaba u myntri rangbah u lah ban pynrung myntri ha kano kano por ia ki.
Da ka WhatsApp pyntip ia ka kong Ampareen, Khlem poi pyrkhat, shah weng myntri
