Shillong: Ka Central Bureau of Communication (CBC), Shillong ka la pynlong ia ka prokram ai jingtip ba kyrpang ha Hubert Memorial Higher Secondary School, Umpling ha East Khasi Hills District mynta ka sngi. La pynlong kum shi bynta ka campaign jong ka Swachhata Hi Seva, Poshan Maah, bad Ek Ped Maa Ke Naam ba la rakhe ha kylleng ka ri, kane ka prokram mynta ka sngi ka la lum lang ïa ki khynnah skul, ki nonghikai, bad ki paidbah baroh ban pynsaphriang jingtip halor ka jingdonkam ban lehkhuid, ka jingbam kaba tei, bad ban pynneh pynsah ïa ka mariang.
Ha kane ka sngi, ka Principal jong ka Hubert Memorial HS School, Sister Julieta Lyngdoh Lungkhoi ka la ai ka jingïaroh ïa ka CBC Shillong kaba la ai ka jingpynshai kaba kongsan ïa ki khun samla bad ruh kaba la wanrah lang ïa ki khynnah skul, ki nonghikai, bad ki paidbah nongshong shnong. Ka la ong ba kum kine ki sienjam ki ai jingtip kiba kham bun ia kaba ioh na ki kot pule. Ka la kyntu ia ki samla pule ban shim ia ki jinghikai ba la ioh ha ka prokram bad ka la pynshlur ia ki ban long ki nongshong shnong kiba don ka jingkitkhlieh kiba sumar ia ka koit ka khiah, ka imlang sahlang, bad ka mariang.
Ka District Higher Education Officer (DHEO), East Khasi Hills, Kong O. Summer, ka la ban jur ïa ka jingdonkam ka jingbam ba tei met ha ka jingtei ïa ka imlang sahlang kaba koit ba khiah. Ka jingbam kaba biang ka dei ka nongrim jong ka jingheh jingsan ka met ka phad, ka jingsan ha ka jingmut jingpyrkhat, bad ka jingïada na ki jingpang, khamtam ha ki khynnah bad ki samla, ka la ong.
Ka Kong Summer ka la pynleit jingmut shaphang ka jingpang duna snam (anaemia), kaba la nang kiew ha ki khynnah skul, khamtam ha ki khynnah kynthei kiba dang khie samla. Ka la batai kumno ka jingduna ia ka iron ka ialam sha ka jingtlot, ka jingbym lah ban pynleit jingmut bha, bad ka jingbym lah ban pule bha. Ka la ai jingmut ban bam man ka por ia ki jingbam kiba don ia ka iron kum ki jhur jyrngam, ki shana dai, ka mithai, ka doh, bad ki jingbam ba tei met kiba lah ban ioh na la ka jong ka jaka. Ka la pynpaw ia ka jingdonkam ban peit bniah ia ka koit ka khiah man ka por, ban dih dawai wieh, bad ban pynsngewthuh ia ki kmie ki kpa bad ki nonghikai ban pynthikna ka jinglap kloi bad ka jingioh jingsumar ha ka por kaba biang. “Ka met kaba ioh ia ka bam kaba tei ka ialam sha ka jingmut jingpyrkhat kaba seisoh,” ka la pynkynmaw ïa ki samla pule, da kaba ban jur ba ka jingkoit jingkhiah bad ka jingjop ha ka jingpule ki ïaid ryngkat ryngkat.
Kum shi bynta kane ka prokram, la pynlong ruh ïa ki jingïakob saindur hapdeng ki samla pule ha ki ar tylli ki thup – ka Swachhata bad Nutrition. Ki samla pule ki la pyni ia ka sap jong ki lyngba ki poster bad ki jingdro dur ba itynnad. Ki jingdro ki pyni ia ki sawdong sawkun kiba jyrngam, bad ki slogan kiba kyntu ia ka jingkitkhlieh lang na ka bynta ka imlang sahlang kaba khuid. Ha ka thup Nutrition, ki samla pule ki la pynpaw ia ka jingdonkam jong ka jingbam kaba biang, da kaba pyni ia ki dur jong ki soh, ki jhur, ki jait khaw, bad ki jingbam kiba tei met. La pynlong ruh ia ka jingiakop kylli jingkylli.
La ai khusnam sha ki nongjop ha ki jingiakop saindur bad kylli jingkylli, bad la ai ia ki syrnot sha baroh ki nongiashim bynta, ban ithuh ia ka jingtrei shitom jong ki bad ban pynshlur ia ki ban rah shakhmat ia ka khubor jong ki campaign.
La pynlong ia ka jingthung dieng ha phyllaw jong ka skul hapoh ka Ek Ped Maa Ke Naam. La pynlong ruh ia ka jingbam smai kum shi bynta jong ka prokram ban pynneh ia ka sawdong sawkun kaba khuid, ban bam ia ki jingbam ba tei met, bad ban sumar ia ka mariang.
Ka prokram mynta ka sngi ka la wanrah lang ïa ki khynnah skul, ki nonghikai, bad ki nongshong shnong ban pynsaphriang jingtip shaphang ka jingdonkam jong ka jingkhuid jingsuba, ka jingbam ba tei met, bad ka jingsumar ïa ka mariang. Haba kren shaphang ki kam ha kane ka sngi, uwei na ki samla pule u la ïasam, “Ka jingthung ïa u dieng mynta ka sngi ka la pynlong ïa nga ban sngew kumba nga ai ei ei biang sha ka mariang. Ngan kynmaw ïa kane man ba nga iohi ba u dang kham heh.”
Sa kawei pat ka khynnah kynthei ka la bynrap, “Nga la ïoh jinghikai haduh katno ka jingbam kaba don ïa ka iron ka long kaba kongsan na ka bynta jong ngi. Ngan pyrshang ban bam kham bun ki jhur bad ki soh ha ïing khnang ba ngan long kaba koit ban khiah bad ban long kiba smat ha skul.”
Ka Swachhata Hi Seva, Poshan Maah bad Ek Ped Maa Ke Naam ha Umpling
