Shillong: Shi sngi hadien ba ka seng ki kali kamai na Meghalaya ka ka All Khasi Meghalaya Tourist Taxi Association (AKMTTA) kala rai ban pyrkhing ia ki kali kamai na Assam ban leit pynhap briew sha ki jaka jngohkai ha ka jylla, mynta ka sngi ka seng kali kamai na Assam ka Motor Parivan Sewakarmi Sanmilita Manch, Assam (MPSSM) kala pynbna da ka jingiakhih bym pud naduh ka 18 tarik u bnai Nailur ban khang ia ki kali kamai na Meghalaya ban kit briew na Assam.
Mynta ka sngi, ka 17 tarik Nailur, 2025, ki kali na Meghalaya kiba thmu ban kit briew na Guwahati kila shah beh noh.
Na ka liang, ka Tour Operators Association of Meghalaya (TOAM), ka la sngewkhia jur halor kane ka jingiakhih namar ba ka ktah ia ka kam jngohkai ha Meghalaya bad ruh kan ktah ia ka ioh kam ioh jam ki samla.
U nongialam ka TOAM u bah Banlumlang Blah ula kyntu ia ka synjuk ka All Khasi Meghalaya Tourist Taxi Association (AKMTTA) u kyntu ia ki nongialam jong kane ka seng ba kin puson bha halor kane ka rai hynrei ban thaw ia ki lad ki lynti ban lah ban poi sha ka thong ban ym ktah ia kiwei bad na ka liang ka TOAM ka kloi ban iatreilang na ka bynta ka jingmyntoi lang.
Ula kyntu ruh ia ki nongialam na Assam, ba kin nym pat shim ia ka sien jam ban khang lad ia ki kali kamai, hynrei ban pynbeit ia ki jingeh na baroh ar liang.
Ka bniat namar ka bniat, khang sa ka MPSSAM ia ki kali na Meghalaya, diaw pdik ka TOAM
