Babu Kular Khongjirem.
Myn ha ka sngi, kata, ka 15th u Nailur 2025, ka la don ka jingleh burom khadduh ia ka met ba dangsah jong I (L) Dr. D D Lapang, u nongialam paidbah, u ba la bat ruh kum u Chief Minister ka jylla Meghalaya jong ngi la san sien san wat. Ka jingleh burom khadduh ia I, la leh da ka sorkar Meghalaya kumba ju leh lem ia kiwei kiwei ki ‘riewkhraw bad nongialam jong ka jylla Meghalaya. Ka jingkwah ka sorkar Meghalaya ban leh burom ha Madan student ka long ba ka khmih lynti ba ki paidbah ba bun balang (da ki phew hajar ngut) kin ioh lad lem ba kin ioh ban ai khublei khadduh ia ka met ba dangsah I (L) Dr D D Lapang.
Phewse, ka la long kaba lyngngoh, kaba phylla bad kyndit pat ba ka jingwan ki paidbah ha Madan student kam long satia kumba la khmih lynti. Kum uwei na ki ‘riew paidbah ba peit pyrman, ha katei ka jaka, napdeng ki State leader ka Meghalaya kiba ka state Meghalaya ka la leh burom da state funeral, dei tang mynnin ka sngi ba ki paidbah ki duna palat. Ka covered gallery kaba don hakhmat ka Govt.Boys’Hr.Sec School, Shillong, ki paidbah ki don thoh mut thoh mat malu mala,imat tang kumba shi spah ngut tam ne duna ei ei, kata ruh lada kheinlang bad kiba phom uniform bad ki khum. Sha ka covered gallery pyrshah ka ing Bible Society, Jaiaw pat ki paidbah ki kham ia don, hynrei ka covered gallery pat ka long kaba rit. Imat, malu mala ki lah ban shong tang kumba 300 ngut ei ei tam ne duna kat kum ka jingantad ba biej. Sha surok Mission ter ter pat, kiba peit kai lyngba ka jar nar ba ker, ki ‘riew paidbah lem bad kiba iaid lynti artad ki don tang khyndiat eh thoh mut thoh mat malu mala, ka surok ka dap tang da ki khum suda. Jin lada ym wan ki heh sorkar (MLA,MDC, govt. Officials bad ki pulit, ki nongap pahara,) ka jingleh burom sorkar ba la pynbeit da ka Sorkar Meghalaya kam shong shit satia. Khlem ki paidbah ba bun balang, ka state funeral kam long satia ruh kaba i shongkun lada don tang para ba heh ba hain.
Ki Chief Minister barim jong ka Meghalaya kiba la leh burom da ka sorkar kum I (L) BB Lyngdoh ha madan Kyrkit, Laban, ka jingbun briew ka la long shaba palat. Tang ki nongkyndong na ki shnong bapher bapher jong ka constituency ba i la mihkhmat, ki paidbah ki ia wan poi hi (khlem siew bai kali satia) ym duna ia ka 5000 ngut ei ei. I (L) E K.Mawlong ruh ka jingbun briew ka la long kaba i shong kun bha. Wat I (L) Dr.Donkupar Roy ha ka state funeral ha Sohra, ka jingbun briew ka long palat ban ia kaba la khmih lynti. Yn nai iakren shuh ia ka jingleh burom khadduh ia I (L) Maieid H.S Lyngdoh ha kaba ki paidbah ki la poi da ki lak ngut la kum u shyiap syndon.
Ka sorkar ka dei ban wad ia ki daw balei duna paidbah eh haduh katto kat ia u Nongialam jong ka state, u Chief Minister la bunsien, u Kpa jong ka Ri Bhoi, u nongsaindur ia ka Meghalaya naduh ba sdang. Kam dei eh tang ban shu kynnoh ne tei pop tangba slap ne ba ktieh ka madan. Ha ka jingshisha, la khmih lynti ba ym duna ia ka shi phew hajar ngut ki paidbah kin poi tang na ki thain Ri Bhoi. Lada mih tang na Jaiaw, Mawkhar, Mission Compound, Wahingdoh, Riatsamthiah,Umsohsun,Wahthappru, ter ter ruh, kata, tang na ki shnong ba don marjan bad ka Madan student, ka Madan Student kan khapngiah hi smam.Imat,kane ka sorkar MDA-II ka la bakla ban pynrung bad pynsngewthuh ia ka mynsiem bad bor pyrkhat pyrdain jong ki paidbah ka Meghalaya. Ki pyrkhat eh tang ia ka roi ka par bad ka kam kamai pisa, kamai spah kamai lak da kaba klet noh ia ka mentality bad morality jong ki paidbah ka jaidbynriew jongngi. Lada ka long kumta, lane ka long ha kane ka rukom, (ba ki peit tang sha bneng kum u siej lung), kan buh lypa ia ka ri bad ka jaitbynriew tip briew tip Blei, tip kur tip kha, bad jingiatip lem jong ngi ha ka jingma kaba khraw hadien ha bud.
Duna briew palat ha ka jingleh Burom khadduh ia I (L) Dr.D D Lapang ha Madan Student Jaiaw, Shillong
