La kumba 70 snem katei ka skul ha Mawblah ka ai ka jing shakri ban pyn nang pynstad ïaki khynnah ka shnong, hynrei ka ba sngewsih ka long ba ha i classroom iba rit la shu ïa phyniang lang naduh class A haduh class 5. Ki nonghikai ki ju ud bad ju nam ïakine ki jingeh, hynrei um don ba peit lane ba ïarap ïaki.
Hadien ba kine ki jing ud jing nam ki la poi sha ka tyllong shkor u Bah Hamletson Dohling ha kapor ba u dang bat ïaka shuki MLA, shi sngi shi sngi u la wanrah ïaka scheme kumba 5 lakh tyngka naka SRWP 2022-23, kumta la ïoh ban shna pynheh ïaka ïng skul.
I Father Sylvanus Nongkynrih i ba dei u Assistant Parish Priest jong ka St Paul’s Parish Upper Shillong bad u incharge ïa baroh ki jing pyntrei (Construction projects) hapoh ka parish, i la ai ka jing ïaroh ka khrwa ïa une u MLA barim, “watla, i bah Hamlet i ïoh trei tang lai snem na ka san snem, hynrei nga la ïoh ban sakhi ïaki ki kam bakhraw ki jong i kiba i la leh”.
Haba nga leit shane shatai nga ju iohsngew ba ki briew ki ju iathuh khana ba dei tang u Bah Hamlet u ba trei da ki kam, ong i Fr. Sylvanus.
“I bah Hamlet ha ka por ba i wan jngoh ïaka skul, i la kular ban leh, i da leh shisha. Hynrei don pat uwei u MLA uba la ai ïanga da ka work order hynrei ha ka por ba nga poi sha block ka dei pynban ka work order ka bym treikam”, bynrap shuh shuh i Fr. Sylvanus.
I Father i ba dei ruh u Asst Parish Priest i pyn kynmaw ïa u Bah Hamlet ba ym dei ban duh jing kyrmen haba mad ïaka nam rem ha ka election kaba dang shu dep shen. I la pyn kynmaw ba u Conrad K Sangma u la mad teng ïaka nam rem hynrei dei ka jing ïai trei shitom ka jong u mynta u la kylla long syndon u Chief Minister ka jylla.
Na ka liang ka skul ka la ai ka jing ïaroh ïa u MLA barim ka Mylliem namar dei ka jing ai jing shakri ka jong i, mynta ki la ïoh ïaki artylli ki classrooms ki ban long ka jing myntoi ïa kumba 140 ngut ki khynnah skul.
Hakane ka jing ïalang plie, kum u kongsan, u MLA barim u ba dei ruh u nong ai buid u Myntri Rangbah u la kren halor ka jing donkam ban pynbha ïaki skul khnang ba kin wanrah ka jing myntoi ïaka thaiñ bad ïaka jylla hi baroh kawei. Na ka liang u MLA barim u la ong ruh watla u khlem poi sha ka thong hynrei un nym shong kli kti hynrei un iai trei beit ïaki kam kiba ïadei bad ka development jong ka thaiñ Mylliem, khamtam ha ka liang ka pule puthi.
Hadien ba la plie ïaki kamra skul la ïoh ka jing duwai bad kyrkhu ïakine ki classrooms da i Father Sylvanus. La ïoh ruh ka jing rwai bad jing shad na ki khynnah kane ka skul.
