Shillong: Ka dorbar synrai ka Meghalaya ka la kut mynta ka sngi, da kaba ioh ruh ia u Deputy Speaker thymmai u Limison D Sangma ka NPP, ula jop ia ka Deputy Speaker thymmai ka ïing dorbar hadien ba ym don nongialeh pyrshah.
Hadien ba la wai ka dorbar, ki MLA na ka liangsynshar bad na ka liangpyrshah kila ia khublei kti uwei ia uwei pat hynrei lait noh tang ki MLA ka VPP kiba mih noh na ka dorbar.
Ha kane ka jingai khublei, la iohi ba ki MLA hapdeng ka jingiapher ha ka seng sain pyrthei hynrei ki pyni ia ka jinglong paralok uwei ia uwei pat hadien ba kila leit ban ai khublei ia u Deputy Speaker thymmai u Limison D Sangma.
U nongialam liangpyrshah u Dr. Mukul Sangma bad u symbud myntri rangbah bah Prestone Tynsong kila khublei bad iakdup ieid. U Dr. Mukul u dei u Myntri Rangbah barim ha kaba u bah Prestone u long myntri mynshwa ha ka por ki dang don lang ha ka Congress kaba synshar ha ka jylla shwa u 2017.
Na ka jingiatyngkhuh ha ka sain pyrthei, u Dr. Mukul ula pynhap shuki noh ia u bah Prestone bad u bah Sniawbhalang Dhar mynshwa, shwa ba kin phet noh sha ka NPP.
La iohi ruh ba u Myntri Rangbah, u Conrad K Sangma bad kiwei ki MLA kila ieng na jaka shong mar synkut ka dorbar ban leit ai khublei ia u Deputy Speaker thymmai bad ia ki para MLA.
Iakdup ieid u Dr. Mukul bad u bah Prestone mar iakut ka dorbar
