Shillong: U Myntri Rangbah ka jylla u Conrad K Sangma ula pynshai ba ka sorkar kan ai ban pyniaid ha ki kynhun shimet ia ka Tura Medical College.
Haba jubab ia kane ka mat hapoh ka ïing mynta ka sngi, kaba la wanrah u nongialam liangpyrshah u Dr. Mukul Sangma, u Conrad ula ong ba watla ka sorkar ka aiti ban pyniaid ki kynhun shimet hynrei ka jaka, ka hospital kan dei beit ha ka jinglong trai ka sorkar bad kim lah ban knieh ia ka.
Ula ong ba ka jingsiew ruh ia kiba leit pule kiba ioh na ka bhah ka sorkar, yn iarap ka sorkar kumjuh kumba leh ha ka Shillong Medical College, ha kaba ki samla pule kin siew tang 30 hajar tyngka bad kaba sah yn buria ka sorkar.
U Conrad ula ong ba ha ka jingshisha, ka sorkar ka kwah ban pyniaid ia baroh ar ki medical college hynrei ka shem jingeh palat ban ioh ia ki nonghikai.
Shwa ia kane, ka kong Ampareen Lyngdoh ka myntri ka tnad ka koit ka khiah, ka la ong ba tang ha Shillong Medical College na bynta 50 ngut ki samla pule, la donkam haduh 97 ngut ki nonghikai bad ka jylla kam pat don ki doctor ban pyndap.
Hynrei ka la kyrmen ba ka Tura Medical College kan treikam noh ia ka klas ha 2026.
Tang T. 30 hajar ka bai pule doctor ha Shillong bad Tura Medical College: Conrad
