Shillong: Ki Pulit ka Ri-Bhoi ki la ioh dain kuna haduh T. 1 lak tyngka eiei tang mynta shi sngi na ki kali kiba tah ïit iong, pyndait ding LED, pyndait siren bad ki bym biang ki kot ki sla.
Ia kane ka jingtalasi la pyllong mynta ka sngi 11 tarik Nailur 2025, ha surokbah NH-6.
Ha ka jingtalasi, ki Pulit ki la lap shibun ki kali kynthup ki kali 2 shaka, 3 shaka haduh ki 4 shaka kiba la pynkhein aiñ, ha kaba la lap bun ki kali kiba tah ïit iong bad pyndait ia ki LED light, kaba pynwit ia kiwei pat ki nongniah kali ha surok.
Ki Pulit ki la tar bad khang ia ki kali kiba tah iit iong, bad ki la bthah ruh ia ki trai kali ba kin weng noh mardor ia ki LED light kiba long pyrshah ia ka ain.
U Additional Superintendent of Police ka Ri-Bhoi District, u bah Orville Massar, u la ong ba kane ka jingtalasi ka dei kaba la pynlong katkum ka jingbthah na u Superintendent of Police ka district.
Shah tar ba tah ïit iong, shah pynpra kiba pyndait LED, T. 1 lak Ioh dain kuna shi sngi
