Shillong: Ka seng Meghalaya Editors and Publishers Association (MEPA) ka la jied biang ia u bah Monarch Shabong kum u President, bad u bah John Thabah kum u general Secretary katba ka kong Banda Blah kum ka nongbat ia ka pla pisa, bad kiwei kiwei dei ki nongkitkam na ka bynta ki samoi trei kam ha kine ki lai snem ban dang wan.
Ia ki nongkitkam thymmai la jied ha ka jingialang kaba la long ha kane ka sngi Saitjain ha Shillong Club.
Haba kren ha kane ka jingialang hadien ba la shah jied biang kum u President u Bah Monarch u la kyntu ia baroh ki trai bad ki Editor ki lad pathai khubor, ban ia treilang ban pynurlong ia ki jingdonkam ka seng, bad ban nang lah ban trei kham bha nangne shakhmat.
Ha ka jingialang, la shim ruh ia ki rai ban sa phah sha ka sorkar kiba iadei bad ki jingeh jong ki lad pathai khubor bad kiwei.
Ha ka jingialang kaba ar, la wan ban iashim bynta ka myntri ba dei peit ia ka tnad Information bad Public Relation ka sorkar jylla ka Dr. Ampareen Lyngdoh, u Commissioner bad Secretary ka IPR u Vijay Kumar Mantri, IAS bad u bah Batlang Samuel Sohliya, IAS Secretary bad u Director ka IPR.
Ha ka jingkren, ka myntri ka tnad Pathai khubor ka Dr. Ampareen kala ong ba bun na ki jingeh kiba kum ki trai lad pathai khubor ki iakynduh, la lah ban punurlong, hynrei dang don kiba dang hap ban iamir jingmut ban pynbeit ia ki jingeh kaba ki iakynduh bad ki jingdonkam jong ki nongthoh khubor.
Ha kane ka sngi baroh ki trai kot khubor, ki trai khubor online ki trai Youtube channel, ryngkat ki nongtrei ki lad pathai khubor bapher bapher kila don lang ha kane ka jingialang kaba ar sien.
Shah jied bah Monarch kum u President ka MEPA
