Shillong: Ka chairperson ka Meghalaya State Commission for the Protection of Child Rights (MSCPCR) ka Agatha K Sangma ka la pynrem jur ia ki runar kiba nud phngar ban dung da u thyrnia injek ia kawei ka khynnah skul dang shen ha surok ha Jaiaw Student, Shillong.
Ka Agatha kaba leit jngoh ia kane ka khynnah kaba shah sumar ha Dr. H Gordon Robert Hospital, ka la kren tyngeh ba ka hok jong ki khynnah ban iaid kjat kam dei ban long ka jingma bad ki khynnah skul ki dei ban iaid kjat beit khlem kano kano ka jingtieng ka jingsyier.
Ha kajuh ka por, u MLA ka North Shillong ruh u bah Adelbert Nongrum hynnin ka sngi, ula leit jngoh ia kane ka khynnah ha jaka sumar bad ula thong pisa ia ki paidbah kiba lah ban ai jingtip ia ki runar kiba la thombor ia kane ka khynnah. U la pynrem jur ia kane ka jingjia bad ula sin ba kum kine ki briew ki dei kum ki ksew laitlan.
Ka la kyntu ia ki pulit ba kin kem kloi noh ia kito kiba donkti ban thombor ia kane ka khynnah bad ban pynshitom kaba biang katkum ka ain.
Ka Agatha ka la pynpaw ia ka jingshaiong ruh halor kane ka jingjia bad ka la ong ba ka donkam ban pynthikna ba ki CCTV ki dei ban treikam ha ki kylleng ki jaka, khnang ban pynsuk ban kthong bad kem ia ki briew kiba leh ia ki kam runar. Ka la sngew dei ruh ban pynkhlain ia ka bor pahara khamtam ha ki jak aba ju jia ki kam bymman ha ka nongbah bad ha kiwei ki jaka.
Lah ban kdew ba ha ka sngi Nyngkong, kawei ka khynnah ka la shah dung da u thyrnia injek ha ki ar ngut ki runar kiba kah dur kiba ap lypa da ka scooty ha surok hakhmat ka Bible Study, ha Jaiaw Shillong kumba ha ka por 2 baje duna eiei myn sngi.
Ka hok ki khynnah ban iaid kjat sha skul kam dei ban long ka jingma
