Shillong: Ym tang shisien hynrei ha ka sien ba-ar ha ki ar taiew, ki paid nongshong shnong ka Amphreng, ki la mih paidbah ban maramot hi ia ka surok kaba la sniew jubor na Amdubighat sha Amphreng.
Kane ka surok ka jrong kumba 2km kaba don ha khappud Meghalaya bad ka jylla Assam.
Ha ka taiew ba la dep, ki paidba na katei ka shnong, ki la dep maramot ia katei ka surok namar ba ki la syrtok eh ha ka leit ka wan bad khamtam eh ha ki por Lyiur.
Ka jingsniew jubor kane ka surok, ka la buh u dak jingkylli ia ki nongmihkhmat, bad kumjuh ia ka sorkar Meghalaya, kaba la leh meinah ia ki briew kiba sah ha ka thain khappud.
Ki briew ka shnong Amphreng ki la kyrpad ia ka sorkar bad khamtam ia u nongmihkhmat jong ka Mawhati Constituency, ba kin shimkhia lem bad ban ym ieh khunswet ia katei ka thain.