Shillong: U President ka Meghalaya Pradesh Congress Committee (MPCC) uba dei ruh u MPA barim, bah Vincent H. Pala, mynta ka sngi ula leit dawa na u myntri rangbah ka jylla u Conrad K Sangma ban pynkiew kyrdan ia ka surok Dkhiah Sutnga Saipung Moulsei Haflong (DSSMH) sha ka national highway.
Ha ka dorkhas ha u Conrad, u bah Pala ula ong ba kane ka surok ka dei u budlum jong katei ka thain na ka bynta ka ioh ka kot, ka khih ka kamai khamtam ba ka Sutnga, Sumer, Saipung, bad Nongkhlieh ka dei ruh kaba riew spah ha ki marpoh khyndew ha kaba ka pynmih kumba 80 percent u dewiong na ka thain Jaintia Hills bad ka la bsa ruh ia ka JHADC bad ia ka sorkar jylla na ka khajna ba ki ioh na ki marpoh khyndew.
Hynrei kane ka surok ka la jot rathai khlem maramot kaba la wanrah ka jingeh ia ki paidbah ka Jaintia Hills.
U bah Pala ula pynkynmaw ruh ba ka tnad Ministry of Road Transport and Highways (MoRTH) kala mynjur ia ka jingtyrwa ban pynheh ia kane ka surok hynrei khlem pat I dak eiei ba ka kam kan sdang. Watla ka sorkar ka pyrshang ban pynrung ia kane ka surok na ka skhim ka World Bank hynrei ka donkam kyrkieh ba kan maramot na ka jingsniew tasam jongka khnang ban pyllait ia ki paidbah na ka jingsuhsat kaba ki pyndonkam man ka sngi.
Dawa pynrung National highway u bah Pala na u Conrad ia ka surok DSSMH
