Shillong: U president ka Khasi Students Union (KSU), bah Lambokstarwell Marngar ula ong ba napdeng ki sorkar ha kane ka thain, dei tang ka sorkar Assam kaba la shim khia ban kyndang bad beh ia ki mynder katba kiwei ki sorkar, ki dang ioh thiah bad jar jar.
Haba kren sha ki lad pathai khubor mynta ka sngi, u bah Lambokstar ula ong ba dang shen ka sorkar India ka la bthah sha baroh ki sorkar jylla ban kyndang ia ki khar Bangladesh hynrei ki jylla kim patiaw lait noh tang ka sorkar Assam.
Ula ong ba dang shen, ki briew na Bangladesh kila rung beain ban leh ia ki kam runar bad kine ki dak ki shin ba ka KSU bad ka NESO kan mih sha madan ym tang ban shu kren tang ki ktien.
U bah Lambokstar ula ong ba ka MRSSA ruh haduh mynta khlem treikam eiei. U la ong ba ka KSU kan iai trei kam bad ka sorkar ka dei ban pyni noh da ki kam mardor, wat lapmiet ban thiah thai.
Ula maham ia kito ki dalal kiba pynrung masi na India sha Bangladesh hynrei kaba shyrkhei ka long ba ki don ki dalal ruh kiba mlien ban iarap ia ki briew na Bangladesh ban pynrung sha India, ba lada ka seng kan lap, kan leh ia kaba donkam.
Na India ki pynrung masi sha Bangla, na Bangla ki pynrung briew sha India|Ka Assam ka la leh, ka Meghalaya jar jar: President KSU
