Shillong: Ki pulit ka Anti-Narcotics Task Force (ANTF), Meghalaya bad jong ka East Jaintia Hills District kila ioh kem ia uwei u briew bad 9 song sabon u drok na ka met jongu ha ka 17 tarik Nailar, 2025.
Ia une u briew uba la tip kyrteng kum u Isak L Joute la kem na Byndihati, East Jaintia ryngkat u drok uba khia 91.86 grams bad u shong dor kumba T.40 lak.
Kane ka jingioh kem ki pulit ka long hadien ba kila pynap shrip na ka jingioh jingtip ia ka jingwan une u briew ryngkat u drok na Churachandpur, Manipur sha Shillong ha ka bos.
Ki pulit ka ANTF ryngkat ki pulit ka Khliehriat kila pynap shrip ia u ha Bynihati bad ha ka 17 tarik ha ka por 02:15 PM, la ioh kem bad kurup ia une u briew na ka bos B/R No AS-01-JC-4999 kaba wan na Silchar sha Shillong. Une u Isak L. Joute (26 snem) u sah ha Madanriting, Shillong, East Khasi Hills.
La pynngat ia u ha ka NDPS Act bad ka jingtohkit ka dang iaid ban tih kham bniah.
Ha kajuh ka por, u SP ka East Jaintia u Vikash Kumar, ula ong ba ki briew kiba iohi ne lap ia ki leh ia ki kam beain, kin pyntip sha ki pulit mar mar bad yn buhrieh ia ki kyrteng jong kiba pyntip.
Shah kem u Isak bad 91 Gram tam u drok heroin ba shong dor T.40 lak na East Jaintia
