Shillong: Jia ryngkhat ha ka jingleit jngoh ia ka Mawphanlur ha syntai lum u Mawthadraishan, la ioh ban iakren ia shi kynhun ki tourist ne ki nongwankai suwari kiba na Dhubri, Assam.
Kaba pynkyndit ka long ba kine ki tourist kiba snah bha bad ki nang bha ban kren Khasi tiak tiak bad swiat swiat.
Ki kila pynpaw ia ka jingsngew tynnad kaba bang ngai ban sah ha katei ka jaka namar ba ki sngew ba ka mariang ka kynoi nalor ba ki sngew shngain bha.
Kine kiba wankai ki nang bha ban kren Khasi namar ba ki sah ha Shillong ha ka por ba u kpa jongki, u long ophisar u trei ha kane ka jylla Meghalaya ha ki snem ba la dep.
Kila pynpaw ba ka jingitynnad ka mariang, ka la pynktik ia ki da ka jingkmen namar shiphang la wan u lyoh, shiphang la wan ka sngi bad ka jingshai bad ka lyer kaba sngew bang nalor ka jingpah ka sur jong ki sim ki doh.
U trai jong katei ka jaka jngohkai, u bah Boni Lyngkhoi u la ong ba kumba ka long mynta ki briew ki la kham tip ia ka Mawphanlur bad ki la sdang ban wan tuid katba nangmih ki sngi bad ki briew ki ju wan poi da ki phew kali man ka sngi bad ki kham bun ha ki sngi shuti.
U la ong ba na ka jingdon jong katei ka jaka jngohkai la lah ruh ban ai kam kumba 15-20 ngut eiei ki trai shnong, ki don sa kiwei pat kiba ioh jingmyntoi da kaba buh dukan. Ka shnong ruh ka la ioh jingmyntoi na ka jingdon kane ka jaka jngohkai ha kaba ka ioh 10 percent na ka bai rung.
Tan ka Mawphanlur ia ki tourist nabar kiba kren Khasi swiak swiak
