Shillong: U myntri rangbah ka jylla u Conrad K Sangma ula ong ba ka jylla Meghalaya ka dei kaba kiew sted tam ha ki jylla ha India ban bud nadien ka jylla Tamil Naduh.
Ha ka jingkren jongu ha ka jingrakhe sngi laitluid kaba 79 jong ka ri India, u Conrad ula ong ba ka jylla Meghalaya ka wan baar ha ka jingkiew sted ha ka ri baroh kawei bad ka jylla Tamil Nadu ka dei kaba nyngkong.
U la ong ba ka jingkiew ka Meghalaya ha u 2024-25 ka long 9.66% kaba long mar shiteng na u snem 2018 ha kaba ka jingkiew ka long tang 5.1 percent, haba ka sorkar MDA hapoh ka jingialam jongu, ka la shimti ia ka jingsynshar ha ka jylla.
U la ong ba ka jingkiew ka jylla Meghalaya ha u 2015-16 ka long tang 2%, katba ha u 2016-17 ka jingkiew ka long 5%, nangta ha u 2017-18 ka long 4%, bad ha 2018-19 ka la kiew sha ka 5%, bad kumjuh ha 2019-20 ka long hi 5%.
Dei ha 2022-23 ba ka la kiew sha ka 10%, nangta ha 2023-24 ka kiew sha ka 11%, bad ha 2024-25 ka jingkiew ka long 10%.
Kane ka jingkiew ka jylla ka dei na ka jingminot, ka jingplan kaba biang bad ka jingtrei shitom ka sorkar.
U myntri rangbah ula ong ba ha u 2018, ka GDP ne Gross Domestic Product ka jylla ka long duna ia ka T. 30,000 klur bad ha kine ki hynniew snem shiteng, ka GDP ka la kiew ar shah sha ka T. 59,626 klur.
Ha kine ki hynniew snem ban sa wan, ka GDP ka jylla kan kiew shuh sa ar shah na kaba mynta kaba long T. 60,000 klur sha ka T. 1,40,000 klur.
Kane ka jingkiew ha ka GDP kan pynioh kam shuh shuh ia ki samla, kan plie lad shuh shuh ia ki nongshong shnong bad kan pyllong ia ka jylla Meghalaya ban poi ha ka kyrdan ba shiphew ha ka ioh ka kot ha ka ri bad kane ka dei ka thong jongka sorkar jong u 2032 bad ka sorkar kan pyrshang katlah katiai ban poi sha kane ka thong.
Beh thong ka Meghalaya ia ka Tamil Nadu ha ka jingkiew sted | ha 2032 yn kot T. 1.40 lak klur: Conrad
