Shillong: U Syiem ka Hima Sohra u Paiem Freeman Sing Syiem, ula pynbna paidbah ba ka Hima ka la khang pyrshah sbak ban leit bam khana bad ban iashet iatiew ha baroh ki jaka kiba hap ha ka Hima Sohra.
Ha ka jingpynbna mynta ka sngi, ka 14 tarik Nailar 2025, u Syiem u la ong ba kumba la pynmih da ka hukum na ka ophis u Syiem Sohra ha ka 25 tarik u Bnai ba la lah, la khang pyrshah ia mynta ban iawan bam khana, ban iashet iatiew ha ki jaka kiba hap hapoh u pud u sam jong ka Hima Sohra baroh kawei.
Kane ka long kum shi bynta ban wanrah ia ka jingpyniaid beit pyniaid ryntih khamtam ha kaba iadei bad ka jingwanrah ia ka jingkhuid jingsuba ha ka thain baroh kawei bad ruh ban kiar na kino kino ki jingjia kiba pynsah nam sniew ia ka Hima. Kane ka jingkhang kan bteng tad haduh ynda pynbna da kumwei pat.
Lah ban kdew ba ha kine ki sngi ba la dep, ki Volunteer ka Hima kila pyllong ia ka jingleit pynsngewthuh sha ki briew kiba wanrah ia ki tiar shet tiar tiew ban pyllong jaka bam khana ha ki rud surok ha ka thain Sohra bad kila phah tam biang ruh ia ki jaboh jabain ba ki bret pathar.
Khang ka Hima Sohra ban bam khana bad iashet iatiew
