SHILLONG 14, Jymmang: Ka jingiakhun elekshon ha Sohiong kala khring bha ia ki paidbah ka jylla khamtam ha ri Khasi-Jaintia namar ba ka long marwei hadien ba la dep lut kiwei pat ki konstitwensi.
Ym lah ban len ba ka NPP kala pyndonkam da ki nongialam ba rangbah jong ka parti khamtam u Vice President uba dei ruh u symbud myntri rangbah u bah Prestone Tynsong nalor u bah Sniawbhalang Dhar bad wat u myntri rangbah u Conrad K Sangma ban iarap ia u kyrtong u bah Samlin Malngiang. Uba kham hakhmat u dei u bah Prestone uba la mareh sha man ki jaka bad ula kynther ia ka UDP ba ka dei tang ka nongsdien bos, kaba lah ban shah pynhiar na ka sorkar.
Na ka UDP, pat nalor kiwei ki nongialam seng kmie, uba kham paw ban iather bad ia kawang nia u dei u bah Amazing Kurbah uba dei tang u nongialam barit ka Sohiong konstiwensi hynrei uba satar bha ban iakhyrwit nia bad u bah Prestone bad u kyrtong ka NPP bah Samlin.
Ha ka jingniew vote pat, ka paw ba u kyrtong ka UDP u bah Synshar Kupar Roy Lyngdoh Thabah ula jop ia u kyrtong ka NPP u bah Samlin Malngiang, ha madan pat la paw ba u bah Amazing Kurbah ula pynliem ia u bah Prestone Tynsong.