Shillong: Ki shipai Border Security Force (BSF) Meghalaya Frontier, ryngkat ka jingiatreilang bad ki pulit ka Meghalaya bad palat 200 ngut ki riew paidbah ka thain khappud, kila pynjur ia ka jingthwet ia ki Gang na Bangladesh kiba la rung beain sha India ban leh ia ki kam runar.
Ki BSF kila pyndonkam ruh da ki ksew K9 bun tylli ban leit sma ban lap ia ka ktem ba ki Gang na Bangladesh ki riehtngen ha ka khlaw ka thain Bagli kaba hap khappud ka South West Khasi Hills.
Kane ka jingleit khynra ka la long hadien ba ka kynhun ki runar na Bangladesh kaba don kumba 8-9 ngut, ka la hiar thma ia ki briew ka India ha ka shnong Rongdangai, ha kaba uwei u samla ula shah dung, bad shah pynjot ki jingdon jingem bad kila pyrshang ruh ban rahbor.
Hapdeng ka 9 haduh 11 tarik Nailar, ki BSF ryngkat ka jingiatreilang ki pulit bad ki riew paidbah, kila ioh kem saw ngut ki runar bad la ioh kurup ruh ia ki tiar kum ka ID Bangladesh Police, wireless sets, wire cutters, ka pisa India bad Bangladesh nalor ki tiar pynbthei na kitei ki gang. Hadien kane, la ioh kem sa 2 ngut kiwei pat.
Uwei napdeng jongki, ula khlad uba la tip kum u Akram na Sherpur, Bangladesh ha lynti sha jaka sumar.
U Inspector General ki BSF Meghalaya Frontier, u O.P. Upadhyay, uba peit hi dalade ia kane ka jingjia, ula ai khublei ia ka jingshlur bad ka jingiatreilang ki paidbah bad ki shipai BSF. Ula pynthikna ba ki BSF kin ai ka jingiada kaba pura ia ki khappud ka India.
Ka jingkhynra ia kiwei ki dkhot Gang kiba dang phet rieh ka dang iaid.