Shillong: U Myntri Rangbah ka jylla u Conrad K. Sangma, ha ka sngi Baar ula hiar sha Eastern West Khasi Hills bad pynbna ia shibun ki lad jingiarap ha katei ka thain.
U Myntri Rangbah ula plie ia ka ophis thymmai ka Mairang C&RD Block, nangta ula plie ruh ia ka Sick Newborn Care Unit (SNCU), Paediatric Intensive Care Unit (PICU), Adult Intensive Care Unit, bad ka High Dependency Unit (HDU) ha U Tirot Sing Memorial Hospital.
La synran lang ia u Conrad da u myntri ka tnad nongkyndong u Abu Taher Mondal, ka myntri ka tnad ka koit ka khiah ka kong Mazel Ampareen Lyngdoh, u myntri tnad ialehkai bah Shakliar Warjri, u MLA ka Mairang bah Metbah Lyngdoh, ki MDC ka Mairang-Nongkhlaw bad ka Pariong-Mawthadraishan nalor kiwei kynthup u bah Marborsing Marbaniang, uwei na ki nongshna tiar kti ba tbit.
U Myntri Rangbah ula iadon bynta ruh ha ka jingrakhe jubili rupa ka Pyndengumiong Presbyterian Secondary School bad ula ai jingiarap ₹15 lak na ka Chief Minister’s Special Development Fund ban pynkha ia ka skul bad ₹3 lak na ka bynta ban thied tiar tem ia ka skul.
Ha kajuh ka por, ula plie ruh ia ka ïing skul thymmai jong ka Manai Higher Secondary School kaba la pynbiang kum ka smart classroom bad community digital library.
Na Block sha hospital sha ki skul, theh tyngka u Conrad ha Mairang
