Shillong: Ki pulit ka South West Khasi Hills kila shim kam da kaba thung da ka jingtohkit halor ka jingioh rung beain ki 6 ngut ki briew na Bangladesh sha India ha ka khappud kaba don ha katei ka district.
Uwei na kine kiba shah bat ha ki paidbah, ula khlad noh hadien ba la niom ha u paidbhur.
Ha ka kyrwoh kaba la pyllait ha ka sngi Baar, u SP ka South West Khasi Hills bah B Jyrwa, ula ong ba la shim kam ia kane ka jingjia ha Nonghyllam Police Station Case No.10/2025, ha ka kyndon 103(1) BNS bad ka jingtohkit ka la iaid ban wad ia ki jingshisha bad ki daw kiba ialam sha ka jingjia.
Ha ka 11 tarik Nailar, 2025 ha ka por 4:30 pm, ki pulit ka Nonghyllam Police Station kila ioh jingtip na ki nongshong shnong ka shnong Kaithakona, ba kila lap ia uwei u briew uba na Bangladesh uba la mynsaw ha ka shnong jongki uba la tip kyrteng kum u Akram.
Hadien kane, ki nongshong shnong kila aiti sha ki BSF ka 01 Battalion camp Kaithakona. Bad ki BSF ryngkat ki pulit ka Nonghyllam kila pynkit noh ia u sha Maheshkola PHC, hynrei na ka jingbym don u Medical & Health Officer ha ka PHC, la pynkit noh sha Khonjoy PHC ha ka ambulance ka Maheshkola PHC hynrei la pynbna da u Medical & Health Officer ba ula khlad noh.
La wanrah ia ka met jong une u briew sha Civil Hospital, Mawkyrwat, ban leh ia ka post mortem ha ka jingdon lang u Magistrate katkum ka kyndon ka NHRC.
Thung jingtohkit ki pulit SWKH ba ioh rung 6 ngut ki briew na Bangladesh
