Shillong: Ka KSU Laban Circle ha ka kylla step jong ka 10 tarik Nailar ha ka por 1 baje mynstep ka la ioh bat ïa 2 ngut ki briew kiba dei ki khar Muslim na Oxford Hills, Laban kaba hap hapoh Dorbar Shnong Kenches Trace Oxford Rilbong.
Hadien ka jingtohkit ka seng, ïa ki kot ki sla lah lap ba kine ki briew kim shym la don kano kano ki kot ki sla ban pynithuh ialade bad la wan ialam ïa ki ban trei bylla ha kawei ka iing kaba don ha Oxford. Ynda la khynra ïa kata ka iing la lap sa 4 ngut ki khar Muslim ki bym don kot don sla. Kine ki briew ki ioh rung sha Meghalaya da kaba ki wan da ki kali tourist bad pynithuh ialade ba ki dei ki nongwan jngohkai bad ha ka jingtohkit ka Seng ka lah lap ba ki dei ki poiei kiba wad jaka rieh shane ha ka kam bylla bad ki ioh jingiarap lyngba uwei u briew uba kyrteng Shajahan Ali uba dei na Assam bad ba sah ha Laban uba pynbiang jaka trei ïa kine ki briew.
Ïa kitei ki 6 ngut la aiti noh sha ki pulit ka Rilbong Beat House ha kato ka kylla step.
Ka Seng ha ka 11 tarik Nailar, mynne ka step ka la leit kyndang sa ïa ka iingsah jong une u briew u Shajahan Ali bad beh krad syndon ïa u. Une u kam ialade ba u dei u kontraktor bad uba ju mlien ban wanrah ïa kine ki briew nabar jylla bad lehse ki lah ruh ban dei ki nong Bangladesh.
Ka Seng ka la maham ruh ïa u trai iing ba ai wai ia une u briew ba ym bit ban ai iing wai sha ki briew kiba wan nabar jylla khamtam ki khar Muslim namar ba dang kyndang ka Sorkar Assam ia ki khar Muslim bad ka jinglong jingman ha Bangladesh, ki khar Muslim ki dang phetwir ban wan wad jaka rieh sha ka jylla Meghalaya.
Ka Seng ka lap ruh ba bun na kine ki khar Muslim ba sah ha Laban ki ju iarap para Muslim ban ai jaka sah, khlem pyntip ia ki bor shnong. Halor kane ka Seng ka la iakren ruh bad ki bor Shnong bad na ka liang ka Dorbar Shnong Laban mynta ki dang pynlong ia ka jinglong sorjamin ban tip ia ki khar Muslim ba shong ba sah ha Laban.
Ka Seng lyngba kane ka kyrwoh ka maham tyngeh ia ki nongshong shnong ka thain Laban baroh kawei ba kim bit ban pynshong pynsah bad pynbuhai shnong ia ki para Muslim ba wan nabar jylla ha Laban bad ki trai iing ki dei ban shimkhia halor kane ka bynta. Lada lap, ka Seng kan shim ia ka sienjam kaba tyngeh pyrshah ia ki trai iing bad kine ki briew kiba ai jaka sah ia kum kine ki khar Muslim ba la poiei hapoh ka Shnong ka thaw bad ka bri Hynniewtrep, la ong ka kyrwoh na u samla Franky Rani, Information & Publicity Secretary, KSU Laban Circle.
Leh mynleh ki mynder kum ki tourist, iarap uba kam kontraktor, shah bat noh ha ka KSU
