Shillong: Ka Catholic Association of Shillong, ka la ujor sha u Chief Minister ka jylla Chhattisgarh u Vishnu Deo Sai, ban noh mardor khlem kyndon ia ki ar ngut ki Sisters kiba shah kem halor ka jingpharep ka seng shit niam Hindu ka Bajrang Dal.
Ha ka kyrwoh sha u Chief Minister, ka Catholic Association of Shillong ka la pynpaw ia ka jingsngew khia jur bad ka jingsngewsih kthang halor ka jingshah kem ki ar ngut ki Sisters ba kynthup ka Sister Preethi Mary bad ka Sister Vandana Francis, lem bad u Sukaman Mandavi, ha Durg Railway Station ha ka 26 tarik Naitung 2025.
Kila shah kem halor ka jingkynnoh ba ki shalan briew bad pynkylla niam jubor hynrei kane ka dei tang ka jingkynnoh kaba khlem nongrim bad kaba la shu shna ban pynbudnam namar ba ka kam jongki ka long ban ai ka jingshakri ia ki para briew khlem khein na kano kano ka niam ne ka jait ne iano iano. Ka Catholic Association of Shillong ka la ong ba ka jingshakri jongki ia u khun bynriew ka iarap na ka bynta ban kyntiew ia ka ri ba kan kiew shaphrang.
Katkum ka jingtip, kine ki sister ki dei na ka Assisi Sisters of Mary Immaculate, ha kaba kila leit synran ia 3 ngut ki kynthei kiba la 18 snem da ka jingmynjur ki kmie ki kpa na ka bynta ban iarap pynioh kam.
Ka Catholic Association of Shillong ka la sngewsih jur halor ka jingkynnoh ka Bajrang Dal da kaba pynshit bad wanrah ia ka jingsngew iapher niam ha jaka ban sei ia ki sakhi ki satar. Halor kane, ka Catholic Association of Shillong (CAS), Meghalaya ka pynrem jur ia kane ka jingjia namar ba ka dei ka jingpynkhein ia ka riti synshar ka ri na ka bynta ki rit paid ban mane laitluid bad ban leh ia ki kam shakri ia ka imlang sahlang khlem kano kano ka jingtieng ne shah pyndik.
Ha ka kyrwoh kaba la soi da u President u bah Vincent H Pala, u Vice President bah Barnabas Nangbah bad u General secretary bah H Kharlyngdoh, kila kyrpad ia u myntri rangbah ban tuklar ia kane ka kam mardor ban pyllait khlem kano kano ka kyndon ia kine ki ar ngut ki sisters na ka judicial custody nalor ban iada ia ki hok bad ka jingshngain jong ki rit paid na ka jingshah pyndik ha ka kyrteng ka jingkynnoh ba pynkylla niam jubor.
Ujor ka Catholic Association of Shillong sha u CM ka Chhattisgarh ban pyllait mardor ia ki Sisters
