Shillong: Ha ka miet 30 tarik Naitung 2025, ki pulit Anti Narcotic Task Force (ANTF) kila ioh kem ia uwei u nongdie drok hadien ba kila kthong ia ka kali jongu ha ka por 9baje mynmiet.
Kane ka jingkrih ki nongdie bad ki nongthied ban wad sha kiwei kiwei ki jaka, ka dei namar ba ki pulit ka ANTF kila pynjur ia ka jingkhynra na ki ktem ba ki ju iathnem bha kum ha Lum Survey bad ha Iewduh, Polo bad ka thain Madanriting, kiba la kham kynjah jar.
La ioh kem ia u na Rhino Point katba u dang mut ban die ia u drok sha ki briew hynrei ki ANTF kiba la kthong bad pynap shrip ia u, kila ioh bat ia ka kali ML05AE0593 ban kem. Une uba shah kem la tip kyrteng kum u Wanphrang Rani, 30 snem uba sah ha Pohkseh, Shillong.
Na ka met jongu, ki la ioh kurup shi song ne shi tyndong sabon u drok ba khia 9.74 gram ba la thep bha, uba shong dor kumba 75 hajar tyngka. La pynngat ia u ha ka NDPS Act.
La ioh jingtip ba ka dor u drok ka la kiew bha ha kine ki sngi hadien ba ki nongthied bad ki nongdie kila shem jingeh ban die pathar na ka jingtalasi bad ka jingkhynra ki pulit ANTF ha kylleng ka nongbah Shillong.
Ha kane ka janmiet, jia ryngkhat ruh katba ki pulit ka Anti Narcotic Task Force (ANTF) ki dang kem ia uwei u nongkhaïi drok, la wan lap kynsan u bah Sanbor Shullai, MLA ha katei ka por.
Mar kumta hi u bah Sanbor ula leit ban sneng ban kraw ia une u nongdie drok ba um dei ban leh ia kane ka kam beaiñ hynrei u dei ban im sngi ban trei shitom ban long briew ym ban leh da ki kam bymman.
U bah Sanbor ula sneng ruh ia une u nongdie drok da kaba ong ba um dei ban duh jingkyrmen hynrei u dei ban trei smat kumba long ma u na ka jingduk ban poi shaduh ka jinglong MLA bad ula ong ia u, mano ba lah ban tip ba wat ma u ruh lada u iaid da ka lynti kaba dei un long MLA kumba long ma u.
Krih kulmar ki nongdie drok ba kulmar ban wad jaka na ka jingkhynra ki ANTF, sneng u bah Sanbor u nongdie drok
