Shillong: Ia ka jaka shet ia u jingdih pynngad kum u umsoh Pepsi kaba heh tam ha ka North East la plie ha Meghalaya mynta ka sngi ha Mendipathar ka North Garo Hills.
Ia kane ka karkhana shet ne bottling plant jong ka kompeni Varun Beverages Limited (PepsiCo) la pynieng ha ka jaka kaba heh 37 acre ha Mendipathar Industrial Area, ha ka jinglut kaba 340 klur tyngka.
U myntri rangbah ka jylla u Conrad K Sangma ula plie paidbah mynta ka sngi ia kane ka karkhana shet umsoh ka kompeni Pepsi.
Katkum ka jingong u myntri rangbah kane ka karkhana kan ai kam ai jam ia ki samla ka jylla bad kan ai jingmyntoi ruh ia ki briew ka jylla bad ka thain, namar ba ka dei ka dak jong ka jingkiew ha ka ioh ka kot ba ka jylla Meghalaya ka la tyllun mynta. U la ong ba ym don ba mutdur satia ba ka jylla Meghalaya kan don kum kane ka karkhana kaba heh tam ha North East.
Ia ka Mendipathar industrial area la seng ha u snem 1990 bad hadien 30 snem khlem don eiei ka jingwan bei pisa ban seng karkhana hynrei dei tad ha kane ka kynti ba la wan ka jingbei pisa ha katei ka jaka.
Ha kane ka karkhana shet jingdih pynngad kum ki umsoh Pepsi yn ioh kam kumba 500 ngut bad da ki hajar kin ioh jingmyntoi lyngba ki kam khaïi jongki.
Ka sorkar kan plie ruh sa kawei ka karkhana ha ka thain Tikrikilla Bajengdoba, ha kaba 90% ka jingtrei ka la iaid.
U myntri rangbah ula ai khublei ia u Chairman ka Varun Beverages Limited, u Ravikant Jaipuria, bad ia u Varun Jaipuria kiba la wan seng ia kane ka karkhana kaba heh tam ha North East.
Ioh ka Meghalaya ia ka jaka shet umsoh Pepsi kaba heh tam ha North East
