Shillong: U MLA ka Mawlai u bah Brightstarwell Marbaniang ula buh jingkylli halor ka jingai rong ia ka surok ha thain Secretriat kaba la pynkhim ia ka surok ban iaid ki kali.
Haba wanrah ia kane ka jingkylli, u bah Brightstarwell u la buh jingkylli ruh ba hato kane ka long katkum ka kyndon ka Indian Road Congress namar ba ka la pynkhapngiah pynban ia ka iaid ka ieng ki kali ha kane ka surok bad hato ka sorkar ka la ioh jingbit namar ba ka dei ka National Highway.
U symbud myntri rangbah ba peit ia ka tnad pynroi sor, u bah Sniawbhalang Dhar uba jubab halor kane, u la ong ba la leh ia kane katkum ka kyndon. U la ong ba ia kane ka kam la leh da ka tnad pynroi sor hapoh ka jingpeit lang ka tnad PWD bad u la ong ba ka dei ka jingpyrshang ban peit ka long kumno bad lada ka biang, yn sa leh sa ha kiwei ki jaka.
U bah Sniawbhalang u la ong ba ka rong ka dei ban long kaba lieh bad kaba stem katkum ka kyndon ba la buh ka Indian Road Congress.
Haba bynrap halor kane, u myntri rangbah u Conrad K Sangma ula ong ba ia kane la leh shi bynta ka Shillong Urban Mobility Policy. Ka jingai rong ia katei ka bynta hakhmat Secretariat ban pynsuk ia ka leit ka wan ki briew bad ki kali bad ka sorkar ka la shim jingkhein man ka sngi ia ki kali kiba ieng kylleng ka jaka, ban tip halor ka jingpynkhreh ban pynbeit ia ka jingeh na ka jingsahkut kali ha ka nongbah.
Kylli u MLA Mawlai ba ai rong ia ka surok hakhmat Secretariat
