Shillong: U symbud myntri rangbah ka jylla u bah Sniawbahlang Dhar ula pyntip hapoh ka iing dorbar mynta ka sngi ba ka sorkar India ka la mang pisa T. 209 klur ban shna lynti rel ha u snem 2017.
Haba jubab ia ka jingkylli kaba la wanrah u MLA ka North Shillong bah Adelbert Nongrum, u bah Sniawbhalang ula ong ba kane ka pisa ka dang sah kumto khlem lah ban pyllut eiei namar ba ka don ka jingpyrshah na ki sengbhalang ban pyntreikam ia kane ka projek.
U la ong ba kane ka pisa ka dei ban siew ia ka bai jaka hynrei namar bym lah ban shim jaka, ka pisa ka sah ha kti u Deputy Commissioner ka Ri-Bhoi.
Haba bynrap halor kane, u myntri rangbah ka jylla u Conrad K Sangma ula ong ba kam don eiei ka jingleh buhrieh bad kane ka kam ym lah ban pyniaid shakhmat namar ba ka don ka jingpyrshah na ki paidbah. Ula iathuh ba la ioh pdiang ia ka shithi na ka North Frontier Railway ban pynphai noh ia ka pisa namar ba ym lah ban pyntreikam.
Ha ka jingshisha, u Conrad u la ong ba kum ka sorkar jylla ka sngew donkam ban don ka lynti rel ban kyntiew ia ka ioh ka kot ka jylla.
T. 209 klur ka bai siew jaka ban shna lynti rel ka sahkut, ong u bah Sniawbhalang
