Shillong: U myntri rangbah ka jylla u Conrad K Sangma ula pynshai halor ka jingkynthoh ki MLA ka VPP pyrshah ia ka jingkren u myntri sorkar bah Kyrmen Shylla ba ka lynti rel sha Jaintia Hills, dei ban rai da ki paidbah ka Jaintia Hills, kumba la paw ha ka lad pathai khubor.
Haba pynshai halor kane hapoh ka iing dorbar, u Conrad u la ong ba ka sur ka sorkar ka dei jong ka sorkar, kaei kaba kren u Myntri Rangbah bad ki nongaiktien ka sorkar kata ka dei ka sur jong ka sorkar.
U la ong ba ha jaka ban iatih ia kawei ka ktien ka bym iahap, kum ki nongialam paidbah ki dei ban iakren ia ki mat kiba ktah ia ka jylla. U la ong ba ka sorkar kan khot ia ka jingialang baroh ki seng sain pyrthei, ki sengbhalang ban iathir halor ka lynti rel. U la ong ba ka sorkar India ka kwah ban pyniasoh da ka rel ha baroh ki nongbah ha ka ri India bad lada duh ia kane ka kabu, kan eh ban ioh biang ia kane ka lad. Hynrei ka donkam ruh ban peit ia ka jingwan tuid ki briew nabar.
U la ong ba ka donkam ban iakren ia ki polisi bad kum ki nongialam paidbah ka donkam ban pynneh ia ka burom jong ka iing dorbar thawain bad ban buh shadien ia ka jingsngew shimet na ka bynta ka jylla.
Pynshai u Conrad halor ka jingshah kynthah ka jingkren u bah Kyrmen ha ka VPP
