Shillong: Ka seng Hynniewtrep Youth Council (HYC) ka la phah ia ka jingai jingmut sha u CEM ka KHADC bah Shemborlang Rynjah halor ki katto katne ki mat ban iada ia ki trai shnong. Ha ka shithi, ka HYC ka la ai jingmut saw tylli kiba kynthup ia ka 1. Ka rukom thungkam kaba khuid: Ha kaba iadei bad kane, ngi kyrpad ia ka EC hapoh ka jingialam ka jong phi kum u CEM ba phin thungkam thungjam hapoh jong ka Council hi baroh kawei katkum ki kyndon jong ka Service Rules 1961 bad ha ka lynti kaba khuid ba suba khlem da pyndonkam bakla ia ka bor kum ki Nongmihkhmat ne shu thung beain kumba lah jia ha ki snem ba lah leit ia kaba lah paw lyngba ka CAG Report 2019.
2. Ka jingai Trading Licence: Ha kaba iadei bad ka jingai ia ki Trading Licence ngi kyrpad iaphi ba phin pyntreikam pura iaki kyndon jong ka THE KHASI HILLS DISTRICT (TRADING BY NON-TRIBALS) REGULATION, 1954 bad ki Rules ba lah shna da ka Council. Ngi ai jingmut ruh iaka EC ba hakaba iadei bad ka jingai Trading Licence iaki bym dei ki riewlum dei ban don ka kyndon ba kiba kum kita ki briew kidei ban dei ki nongshong shnong kiba pura ka jylla.
3. Ka jingiada iaki Khlaw ki Btap ba ki Tyllong Um: Ka EC kadei ban shim khia ban pynneh pynsah iaki Khlaw ki Btap bad ki Tyllong Um ha kylleng u pud u sam ka Council lyngba ka jingiatreilang ki Dorbar Trai Ri. Ngi ai jingmut ruh ba dei ban pynneh pynsah iaka jingjyrngam ka mei mariang lyngba ka jingpynbna ‘Law-Adong’ hakiba bun ki jaka nalor kiba lah don mynta. Ngi ai jingmut ruh ban shim khia ban pynkhie im biang bad pynkhuid iaki Wah kum ka Wah umkhrah, umshyrpi bad kiwei bad kumjuh ruh ban iada iakiwei pat ki Wah kiba don jingma lyngba ka jingle thurmur bad pynjaboh iaki.
4. Ban tehlakam iaka Benami: Ngi kyrpad iaka EC hapoh ka jingialam jong phi ba phin thaw iaki lad ki lynti kumno ban tehlakam bad pyrkhing bha halor ka khaii ka pateng bad ka jingshim kabu jong ki briew kiba mlien ban shu kam kyrteng naka bynta ki nongkhaii kibym dei ki trai ri trai muluk dakaba leh Benami. Ka Council kadei ban shim kam Tyngeh lada lap iakiba kum kita ki briew kiba leh Benami hapoh u Pud u sam ka Council baroh kawei.
Na ka liang jong ka Seng ka kloi ban iatreilang ban ai jingmut halor kumno ban pynurlong iakitei ki jingai jingmut haneng hakano kano ka por, la ong ka kyrwoh na u bah Roy kupar Synrem,President HYC.