Shillong: Ki paidbah ka ri Khasi-Jaintia kin iashim bynta lashai ka sngi,ka 21 tarik Rymphang, 2025, ban jied ia ki 29 ngut ki MDC sha KHADC bad kumjuh sha ka JHADC.
Ha kane ka juk Social Media, ka jingialap elekshon ka khluit bha ha ki rynsan kum ha Facebook, WhatsApp, bad lyngba kiwei ki lad da kaba shu phun ia ki paralok parajor wat kiba don hajan bad sha jngai.
Ka jingmih kane ka Social Media ka la pynsuk ia ki briew ban iawer ban ialap ban kyrshan ia ki kyrtong ba ki mon bad kyrshan wat shaduh ki kyndong kynshrot ruh, khlem da donkam ban mareh ban pyllut ia ka por bad ka bor.
Hynrei ka don ruh ka jingktah namar ba lyngba ki Social Media, ki briew ki suk ban pyndonkam bakla ban ialam bakla ia u paidbah da kaba kynthoh da ki nia lait jynhaw ban ktah ia kiwei ki kyrtong bad ban pynkiew skong ia ki kyrtong lajong.
Lehse lah ban ong ba lyngba ka Social media, ka pynioh mynsiem ia kiwei bad ka pynduh mynsiem ia kiwei pat tang da kaba shu pynsaphriang ia ki khubor bym shisha.
Namar ba ka tnad pyniaid elekshon ruh kam pat don lad ban tehlakam ia kum kane ka juk ki Social Media, ka la plie lad lut ia u luk u lak, u bym tip ia ka bneng ka khyndew ban shu padiah lyntait ia uno uno u kyrtong ba ki mon tang lyngba ki budom mobile na kti.
Kumta, lah ban ong ba ka Social media ka dei ka rynsan ialap elekshon kaba suk tam bad kaba sniew tam ha kajuh ka por.
Ki Social Media ki rynsan ialap elekshon ba suk bad sniew tam
