Shillong:Ha ka sienjam kaba khraw na ka bynta ka roi ka par jong ki khynnah ba dang rit ka rta ha Meghalaya, ka Sorkar Jylla hapoh ka Meghalaya Early Childhood Development (ECD) Mission ka la soi ïa ka Memorandum of Understanding (MoU) bad ka Van Leer Foundation (VLF), Hague, Netherlands, ban pynkhlain shuh shuh ïa ka jingpeitngor halor ka jingsumar, ka pule puthi, bad ka bha ka miat jong ki khynnah ba dang hapoh ka rta kaba 3 snem eiei.
Ha kane ka jingïasoi MoU la donlang ki heh sorkar, kynthup ïa u Principal Secretary & Development Commissioner, Shri. Sampath Kumar, IAS, ki heh ophisar na ka Tnad Social Welfare, Smt. CD Lyngwa, Director, SWD, Smt. D Pyrbot, Assistant Director-ICDS, SWD. La kynthup ruh ia ki dkhot na ka Van Leer Foundation (VLF) Ms. Rushda Majeed, Chief Program Officer, Shri. Prakash Kumar Paul, Country Lead, ryngkat bad ki dkhot na ka ECD Mission, Meghalaya Government Innovation Lab (GIL), Meghalaya Health Systems Strengthening Project (MHSSP) bad kiwei pat ki nongmihkhmat na ki tnat treikam kiba pher ba pher.
Ha kane ka jingïatreilang, ka Meghalaya ECD Mission bad ka Van Leer Foundation, ka long ban pynkhlain shuh shuh ïa ki ain-treikam bad ki program jong ka ECD, kiba long ban kyntiew ïa ka jinghikai ïa ki nongsumar bad nongtrei jong ka ECD Mission, bad ban pynsngewthuh paidbah halor ka jingdonkam ban pynbha ïa ka jinglong jingman jong ki jaka pule ki khynnah bad kumno ban ai jingsumar ïa ki.
Haba kren ha kane ka jingïalang, u Principal Secretary & Development Commissioner, Shri. Sampath Kumar, IAS, u la ong, “Ka Meghalaya Early Childhood Development (ECD) Mission ka dei ka sienjam kaba nyngkong eh ha ka ri India kaba la wanrah da ka sorkar jylla hi ban pyntreikam ïa ki lad jingïarap na ka bynta ki khynnah ba dang rit ka rta lyngba ka rukom trei kaba kynthup ïa baroh ki liang jong ka roi ka par. Kane ka mission ka don ka thong ban pynpaw ba uwei pa uwei u khynnah ha Jylla un lah ban poi sha la ka jing tei met ba pura, da kaba pynshlur ban ai ïa ka bam ka dih kaba tei met, ka koit ka khiah, ka pule ka puthi, bad ba kine ki khynnah kin ioh ruh ia ka jingsumar kaba hok na ki kmie ki kpa.”
Ha kane ka jingialang la kdew ruh ba ka ECD Mission ka dei ka jingïatreilang hapdeng ki tnad sorkar bapher bapher, kaba kynthup ïa ka Tnad Ka Koit Ka Khiah, Social Welfare, Education bad Community & Rural Development, ban pynskhem ki hynriew bynta kiba kongsan bha ha ka liang ka jingpynïaid ïa ka ECD. Kine ki kynthup:
1. Ka koit ka khiah kaba bha,
2. Ka lad pule puthi ka bha,
3. Ka koit ka khiah jong ki kmie ki kpa,
4. Ka jingbam kaba ai bor met,
5. Ka jingsumar ba dei hok na ki kmie ki kpa, bad
6. Ka jingshngaiñ bad ka jingsuk ka jingsaiñ jong ki khynnah.
Kum shibynta jong kane ka jingïatreilang, ka kynhun jong ka Van Leer Foundation kaba la lamkhmat da ka Ms. Rushda Majeed bad Shri. Prakash Kumar Paul, Country Lead-VLF, ryngkat bad ki dkhot na ka ECD Mission, ki la leit jurip ïa ki bynta bapher bapher jong ka jylla ban peit bniah ïa ka jinglong jingman jong ki lad jingïarap na ka bynta ki khynnah. Ha kane ka jingwan jurip, ki la leit sha Ri Bhoi District, ha Rongphartong Anganwadi Centre, Umling Block, kila ïa kynduh bad ki nongsumar, ki nongtrei, bad ki kynhun shnong kum ka Village Health Committee (VHC). Ki la leit ruh sha Umrandairy Community Hall, Umsning Block, ban ïashim bynta ha ka Village Health and Nutrition Day (VHND), ban peit bniah kumno ki lad ECD ki la ïasnoh lang bad ki program ka jingkoit jingkhiah jong ki longkmie ba armet.
Kane ka jingïatreilang ka dei ka sienjam kaba kongsan ban pynkhlain ïa ka Meghalaya kum ka jylla kaba peitngor shisha ïa ka bha ka miat bad ka koit ka khiah jong ki khynnah kiba dang rit ka rta bad ban kyntiew ïa ka Ri lyngba ka jingpynkhreh ïa ka lawei jong ki.