Shillong: U nongbishar ba la shongthait, u B.K. Katakey uba la shah bynshet ha ka High Court, Meghalaya ban tohkit ia ka jingtih bad shalan dewiong beain ha ka jylla, u la bthah ban aiti ia ka kaiphod jong ka jingsorjamin na suin ha ka 28 tarik Rymphang ban wan.
Haba kren mynta ka sngi sha ki lad pathai khubor, u B.K. Katakey ula ong ba haduh mynta ka jingioh kurup ia u dewiong beain ka dang don ha South Garo Hills hynrei ha kiwei ki district kam don eiei katkum ka kaiphod na ki Deputy Commissioner naduh u Naiwieng mynshem snem haduh u Kyllalyngkot mynta u snem.
Na South Garo Hills la ioh kurup 2500 metric ton u dewiong bad kane ka mut ka jingtih bad khaïi dewiong ka dang don bad ka jingwanrah nabar ka don.
U la ong ba ula aiti sha ka High Court ia ka kaiphod bad ka shong ha ka High Court ba kan leh ia kaba donkam.
U la ong ba la bthah ban sorjamin na suin ban tip ia ka jingdon u dewiong bad ka jingtih dewiong ha baroh ki district lait noh ka South West Khasi, la aiti ha MBDA ban leh sorjamin ha ki 6 tylli ki jaka bad kan aiti ha ka sngi Thohdieng ban wan.
Katkum u B.K. Katakey, dang don 13 lak ton eiei u dewiong ba la tyrwa ban die lilam, 11 lak ton la tyrwa die lilam bad 3 lak ton ym pat tyrwa die lilam.
U la pyntip ruh ba la don 7 tylli ki jingujor ba u la ioh pdiang haduh mynta halor ka jingshalan bad tih dewiong beain kynthup ha West Khasi Hills bad South Garo Hills katba ha kaba iadei na East Jaintia, la ioh jingujor kawei bad la bthah ha DC ban tohkit bad ban aiti ia ka kaiphod ha kane ka sngi Palei ban wan.
Halor ka jingioh dewiong ki kompeni sain dewbilat, la bthah ban aiti ia ka kaiphod hapoh ar taiew.
Phah sorjamin u Chairman na suin ban lap ia ka jingtih bad jingdon u dewiong beain
