Shillong: Ka sorkar pdeng ka lah ban kynran dien noh ban shna lynti rel sha rilum Khasi-Jaintia namar ka jingiai pyrshah jur ki sengbhalang.
Ka sorkar pdeng lyngba ka tnad Railway kan thoh sha ka sorkar Meghalaya ba kan rai halor ka lynti rel ha rilum Khasi ha kine ki bnai ban wan.
Haba pyntip ia kane, u myntri rangbah ka jylla u Conrad K Sangma u la ong ba ka tnad Railway ka sorkar pdeng kan pan ia ka rai na ka sorkar jylla halor kane bad ka sorkar kan hap ban ai rai.
“Hadien ba nga la pynsngew ia ki jingsngew khia jong ki paidbah halor ka lynti rel, u myntri ka tnad rel ka ri, u la mynjur ban wan sha Shillong ban iakren bad ki kynhun bapher bapher”, la ong u Conrad.
Katkum ka jingong u Conrad, lada ym lah ban pyniaid shakhmat ia ka kam, ka sorkar pdeng ka lah ban weng noh ia ka projek shna lynti rel lane ka lah ban pyniaid noh shawei ka bynta ka jylla.
Lah ban kdew ba ki sengbhalang kila ieng pyrshah ia ka jingthmu wanrah ia ka lynti rel sha ka rilum Khasi khlem pat pyntreikam shwa ia ka ain tehlakam ia ki briew nabar kum ka Inner Line Permit.
Lah ban kynran dien ka sorkar pdeng ia ka lynti rel
