Shillong: Mynta ka step, ki nongdie madan kila leit tur sha ophis ka Shillong Municipal Board ban pyrshah ia ka jingpynkhreh jongka, ban pynkynriah noh napdeng Khyndai Lad sha kiwei ki jaka.
Haba kren sha ki lad pathai khubor, u Secretary ka seng ki nongdie madan, ka Meghalaya and Greater Shillong Progressive Hawkers and Street Vendors Association (MGSPHSVA) u bah Shane Thabah u la ong ba ka daw kaba la pyllong ia ki, ban leit tur bad shong kyrain ha ophis ka Municipal, ka dei halor ka daw ba ki wan tur biang sha ka Ophis Shillong Municipal Board, ka dei hadien ka jingbuh por ar sngi ban khot jingialang ia ka Town Vendor Committee kam shym la urlong satia.
Ula iathuh ba kila buh ka shithi ha ka 21 tarik mynta u bnai ban kyrpat ïa ka SMB ban khot ïa ka jingialang ka Town Vending Committee halor ka jingpynbna ban phah soi halor ka mat ban pynkynriah ia ki nongdie madan sha ar tylli ki jaka ba la ithuh ka Sorkar.
U la ong ba ki nongdie madan ia mynta kin bteng beit man ka sngi ban wan shong kyrain bad ki plakad ha phyllaw ka Shillong Municipal Board lada ka katei ka ophis kam khot ïa ka jingiakren ban pynbeit ïa ki kam hapoh ka Vending Town Committee.