Shillong: U President ka UDP u bah Metbah Lyngdoh ula ong ba ki paidbah ki dei ban bishar bad pynshong nongrim bha ban jied ia ki kyrtong ha ka MDC elekshon kaban sa wan. U la ong ba ka UDP kam kwah ban shu tam nangne nangtai ban shu pynieng kyrtong hynrei ka da bishar bniah shwa.
Haba kren mynta ka sngi, u bah Metbah ula ong ba ka UDP ka don ki kyrtong kiba kat ki kyrtong, kiba la ih bha ban noh synniang ia ka party bad kumjuh ia ka District Council.
U la ong ba ka UDP ka la ioh ban ialam ha KHADC ha kine ki snem ba la dep, ha kaba ki paidbah ki donkam ban tip bad pule bha na ka bynta ka jaitbynriew bad ka synshar khadar. Ha kane ka kynti ba mynta ka party kan pynkynmaw ia ki kam kiba la leh bad ban pyllait ruh ia ki kam ban sa leh ha ka manifesto.
“Ngi mih ha kane ka elekshon kam dei halor ki jingkular ban sa leh hynrei ha KHADC ngin la ioh ban ialam ia ka EC ha KHADC bad ki paidbah ki donkam ban tip na ka bynta ka jaitbynriew jong ngi, ka synshar khadar, ka khyndew ka shyiap”, la ong u bah Metbah.
Ha kajuh ka por, u la ong ba ha ka jingshisha, u bah Process T Sawkmie u dei u dkhot ka UDP hynrei ym lah ban ong eiei ia ka rai jong u ban iakhun noh kum u kyrtong shimet da kaba kyntait ia ka party. U la ong bay m lah ban ong eiei ia ka rai jong u bad ka shong ha ka rai jong u.
Pynshong nongrim bha shwa ban jied, ngi don kiba ki kyrtong kiba la tbit: Metbah
