Shillong: Mynta ka sngi, ka Hynniewtrep Border Dispute Redressal Forum (HBDRF) ka la aiti ia ka dorkhas sha ka Meghalaya Human Rights Commission (MPHRC) halor ka jingshah thombor bad shah knieh ki briew ia ki hok longtrai mantrai halor ka khyndew ka shyiap jong ki briew kiba don ha khappud.
Haba kren halor kane, u nongialam kane ka kynhun, u bah Chandame Sungoh ula ong ba kane ka kynthup ia ka jingshah knieh ia ka jaka ka puta ha ki briew na Assam, halor ka jingshah pyndik ia ka hok briew man briew namar ba la pynhap jubor ia ki jaka sha Assam namar ba la leh khlem ka jingtip bad ka jingmynjur ki trai jaka bad kawei pat ka jingujor ka dei halor ka jingshah pynduh ia ki kam pynroi kiba don 31 tylli ki shnong ki bym pat don surok kali, kim don ki umbam umdih kiba biang, ki don 19 tylli ki shnong kim don skul satia.
Ula iathuh ia ka jingjia ha ki snem kiba la dep kiba la shah thombor ha ki lehnoh Karbi haduh ba ki briew kila hap ban phet shnong sha Sahsniang bad kiwei ki jingshah pyndik ia ki Khasi-Pnar khamtam ka jingshah thombor ki kynthei kiba sah ha katei ka thain.
Na ka liang ka Commission ka la kular ban pule bniah ia kane ka jingujor bad kan sa leh ia kane katkum ka rukom ban leh.
Ujor ka HBDRF sha ka MHRC ia ka jingshah ieh khunswet ki 31 shnong ha khappud
