Pyrshah ki 15 shnong ba thmu wanrah marten ha Nonghali

Shillong: Ki 15 Tylli ki Dorbar Shnong hapoh ka Synjuk Nongshynshar Shnong Par Umkhen kila pyrshah jur halor ka jingthmu ka sorkar jylla ban wanrah ia ka jaka theh ñiut ne Marten ha Nonghali.
Ka sorkar ka la buh ruh ban pyllong ia ka jingsngap paidbah ha ka 9 Tarik mynta u Bnai.
Haba kren sha ki lad pathai khubor mynta ka 6 Tarik Kyllalyngkot, u President ka Synjuk u Bah Super Rangaid ula ong ba ka Synjuk kala pynher ki jingthoh sha ki bor sorkar shaduh u myntri sorkar ka tnad Pynroi sor ban ym shah ban wanrah jaka theh ñiut ha Nonghali hynrei ka sorkar kam shym la shah shkor namar ba ka la khot ban pyllong syndon ia ka jingsngap paidbah ha ka 9 Tarik mynta u bnai.
U la kynnoh ba kane ka lah ban dei ka jingthmu barieh bad sopsop jong ka Sorkar jylla ban wanrah Marten ha Nonghali..
Ka Synjuk kala maham ba lada ka sorkar ka thom da ka bor ban pynlong jubor ía ka jingsngap paidbah, ki paitbah ki Nongshong shnong ruh kin thom da ka bor bad lada jia eiei ka sorkar kan hap bah khlieh.
U la ong ba ka jingpyrshah ka long ha ka nongrim ba ka don ka wah Umkhen kaba ki nongshong ha kitei ki thaiñ ki ju pyndonkam ïa katei ka wah ban sait, ban pyndonkam um bam um dih, ki ioh dohum dohwah ban khwai na katei ka wah bad ruh ki don ki jaka rep jaka riang bad ruh kan ktah ïa ka koit ka khiah lada don ka Marten.