Shillong: Ha ka sngi Nongkrem ka 15 tarik u Nohprah 2024, ka Seng Khasi Nongthymmai Madanryting Pyllun (SKNMP), ka la pynlong ïa ka Seng Kyrsiew 2024, ïa kaba la pynlong ha Madan Nonglum, Mawlynrei, Shillong.
Ha kane ka seng kyrsiew, la ïoh ïa ki jingkren, ki jingrwai, ki jingshad tynrai bad kiwei kikwei pat ki prokram, kiba da pynshongkun shisha ïa kane ka seng kyrsiew.
Ha kaba sdang ha ka por mynstep, ka la don ka jingïalum ki kur ki kha ka SKNMP ha ïing seng ha Nongthymmai, kaba hangne u President rangbah ka SKNMP u Rgh Kworshon Marbaniang u la ai ïa ka nguh ka dem bad hadien kane ka la don pat ka jingïaid lang shrup da ki kali sha madan Nonglum, Mawlynrei.
Ki riew pawkhmat kiba la wan ban ïa don bad sakhi lang ïa kane ka seng kyrsiew ka kynthup naduh ka Dr M. Ampareen Lyngdoh myntri ka sorkar jylla, u Chief Executive Member ka KHADC u bah Pynïaid Singh Syiem, u MLA ka Mawryngkneng u bah Heavingstone Kharpran, u President bad General Secretary Seng Khasi Kmie, Rgh O. Pyngrope bad Rgh Hainess Marbaniang, u Syiem ka Hima Mylliem Pa’iem Ainam Manik Syiem, Syiem Khynnah ka Hima Khyrim, Pa’iem Habapan Syiem, Syiem Khynnah ka Hima Sohra, President ka Seng Khihlang Rgh H. R Kurbah nalor kiwei kiwei pat.
Shwa ban sdang ka seng kyrsiew, la kyntiew ïa ka lama ka Seng da u Presdient ka SKNMP u Rgh Kworshon Marbaniang bad bynrap sa ka nguh ka dem kaba la ai da u Wanter Lyngdoh Tdong, ka jingkren pdiang sngewbha la ai da u Rgh Drester Kharkrang ba dei u Chairman ka Seng Kyrsiew Committee, SKNMP, kaba hadien kane, la pynïaid shakhmat ïa ki prokram.
Ki lai ngut ki nongkren ba kongsan ha kane ka seng kyrsiew ki long ka jingkren maitphang na u President ka Seng Khasi Kmie u Rgh O. Pyngrope, ka jingkren na u Rgh Pynshailang Marbanaing ka SKNMP, uba la kren halor ka phang kawei ka mut kawei ka thew, kaba dei ruh ka phang jong ka jingpynlong ïa kane ka seng kyrsiew bad kumjuh ka jingkren na I Dr Solony Bareh ka SKNMP.
Ha kane ka seng kyrsiew, la sam ruh ïa ki khusnam Tyngshain Phyrnai Academic Award sha ki khun samla ka SKNMP kiba la lah ban pass bha shakhmat ha ki kyrdan pule bapher bapher ki jong ki.
Katba ïa ki kyntien ai khublei la ïoh na u Rgh Richesly Jana Nongbet, Convenor Seng Kyrsiew Coimmittee, SKNMP.
Hadien ba la dep ka bynta ba nyngkong jong ka programe, la pynbud pat sa ka rwai ka tem, ka shad ka kmen kaba la ai da ki khynnah, ki samla na ki tnat Seng Khasi bad Seiñ Raij.
Ka seng Kyrsiew ka Seng Khasi Nongthymmai ban khot biang ia kiba la bakla lynti
