Shillong: Ka seng Voice of the people (VPP) ka la kam ba ka jingmih ka result ka jingthoh eksamin MCS kam kaba la pyllong ka Meghalaya Public Service Commission (MPSC) kala pynsah kale ia ki samla kiba ialeh ia kane ka eksamin na ka jingshah thok.
Ha ka kyrwoh mynta ka sngi, ka VPP ka la ong ba la tip paidbah ba ha kane ka sorkar, ka jingleh shiliang, ka jingpeitkhmat shiliang da kaba ailad ia kito kiba don ka jingiadei bad ki briew kiba don ha ka sorkar. Kane ka la pyni ba ka MPSC ka la phiel ban ai ka jingshaniah ia ki paidbah khamtam ia ki samla. Haba bishar ia ka result ka MCS, ka paw ba ka don ka jingpang kaba shyrkhei ban pynbakla bad pynswai ia ka MPSC.
Ha ki paidbah, ka la don ka jingpyrkhat ba ki jingdkoh bad ka jingbym ler jong ka MPSC ka la iai bteng bad kane ka la ktah ia ki samla ialeh ia ki eksamin kam bad kito kiba dei hok ha ka jylla. Na ka eksamin ka MCS dang shen, ka paw ba ka jingleh shiliang ka la kiew sha kliar jong kane ka met kaba la treikam katkum ka kyndon ka riti synshar ka ri. Ka long kaba sngew ma bad ka jingshyrkhei haba ka met kaba la pynkup bor da ka riti synshar ka la phiel ban pyniaid ia ka eksamin haduh ban duh ka jingshaniah jong ki paidbah.
Ka VPP ka la dawa ba ka dei ban sei madan ia ki kyrtong kumno ka la jied bad kumno ka thungkam, bad kaei ka mark ba ka la buh. Ka MPSC kam lah ban buhrieh ha ka kyrteng ka jinglong shimet, ka dei ka met jong ki paidbah bad ka dei ban bud ia ki nongrim jong ka jingbishar hok, ka jingshai bad ka jingai jubab sha ki paidbah.
Ka Meghalaya Public Service Commission (MPSC) ka dei ban shakri ia ka jylla bad ki paidbah da kaba pynrung kami a ki briew kiba tbit, kiba dei hok hynrei ka paw ba ka shah pynshad shrieh ha ki polishian kiba don ha ka bor bad ka la iahap ban ai kyrteng kum ka ‘Mostly Politicians’ Service Commission.’
Lada ban ioh kam, hap ban kyllain umphniang ia ka pla jongno Jongno, kan kylla long kum ka ‘Money Pays Service Commission.’ Ka jingthmu ka MPSC ka long ban ai ka jingshakri bad ka jingpyniaid kaba khuid ha ka rukom thungkam bad kam dei satia ka kam nongkynti jong kano kano ka sorkar ne kano kano ka seng, hynrei ka dei ban long kaba khuid, kaba don ka jingthmu, bad kam dei ban iasyrdoh bad kano kano ka seng sain pyrthei bad ka jingthungkam, la ong ka VPP.
Sah kale ki samla ialeh kam, ka MPSC ka kylla ‘Money Pays Service Commission’, kynnoh ka VPP
