Shillong: U MLA ka South Shillong, u bah Sanbor Shullai ula ong ba ka thain Laban ka dei kaba la kyrkhu kyrpang u Blei namar ba kat ka jingkyrduh um ha sor Shillong hynrei ha thain Laban ym ju don ba thied um namar ba ka biang ka um.
Haba kren mynta ka sngi ha ka jingplie ia ki skhim pynroi ha ka Upper Lumparing, u bah Sanbor ula ong ba nangne shakhmat lei, ki briew ki lah ban shna iing haduh 6 mala hadien ba la pylla ia ka ain shna iing ke Building Byelaw ha kaba ki lah ban ai wai ia ki briew, kiba wan kai sha kane ka jylla.
Ula ong ba kum u trai shnong kum u kpa trai, u sngewthuh thik thik ia ka jingeh jong ka konstitwensi bad ula kyrpad ia ki paidbah ban ym ieh ia u haba ka por kaba u donkam.
Ha kajuh ka por, u bah Sanbor ula ong ba baroh ki myntri sorkar, u myntri rangbah ruh ki ieid ia u namar ba um ju leh heh bad um ju rah pulit bad um ju leit tamasa Cherry Blossom, bad um ju kwah ban leit sah ha iing sorkar namar ba u kwah ban shakri bad don hajan ki paidbah.
Ula ong ba sa shi snem shiteng yn sa shimti ia ka shuki myntri na u bah AL Hek bad un sah beit ha iing bad um treh ban leit sah sha iing sorkar.
Ha kane ka sngi, u bah Sanbor ula plie pyrda ia ki skhim kiba la kot sha ka T.5.32 klur ha Upper Lumparing.
Ula plie ruh ia ka Greater Lumparing Additional Water Supply Scheme na ka skhim AMRUT kaba T. 3.13 klur bad ia ka surok kali ha Madan Laban kaba la shna ha ka jinglut kaba T. 1.77 klur.
Baroh ki skhim kynthup kiban sa sdang bad kiba ula plie ia kiba la dep, ka la kot sha ka T.10.22 klur.
Kat ka jingkyrduh um ha sor, hynrei ha Laban ym ju don ba thied um, ong u bah Sanbor
