Shillong: Ka seng Voice of the people party (VPP) ka la kynnoh ba ka jingpyllut kai ka sorkar ia ka pisa haduh T. 28 lak ban pynbha briew ia ka IGP Point ka dei tang ka kam thamula ban pynbha briew ym ban pynbeit ia ki jingeh.
Ha ka kyrwoh ka VPP, ka la ong ba kane ka jingpynitynnad ia ka IGP Point ka dei ka kam pynsyrwa kai ia ka pisa u paidbah na ka Smart City Project. Ka jingshna ka sorkar da ka dur ka iing trep ia ka jaka khaweh kali ki pulit pyniaid kali, ka dei pynban kum ka eitmat kaba pynsyrwa kai ia ka pisa paidbah ia ka kam ka bym shohler eiei.
Ha ka jingshisha, ka sorkar ka dei ban pylleit jingmut ban pyndonkam ha ki kam kiba ai jingmyntoi ia ki paidbah khamtam ha ka kam rep kam riang sha ki jaka nongkyndong, bad ha ki kam kiba ai jingmyntoi ia ki paidbah. Kaei ka jingdonkam jong ka nongbah Shillong, mano ba donkam, la buh jingkylla ka VPP.
Ka la kynnoh ba kane ka sorkar ka jngi tang ha ka jingmut dur khlem kano kano ka jingpyrkhat ia kaba myntoi ia ki paidbah. Ka la buh jingkylli mano ba don bynta ha lyndet kane ka jingpynbha dur ia ka IGP Point, hato ka sorkar ka kham sngew khia ia ka jingpynitynnad bad ka jingmutdur ban ia kaba pynbeit ia ki jingeh ba shisha ki paidbah. Ka kren tang ia ka Smart City hynrei ka klet ia ka Smart Governance ne ka jingsynshar kaba larkam.
Shu lapmiet ka sorkar ban pynbha briew, khlem pynbeit ia ki jingeh ki paidbah, ong ka VPP
