PIB Shillong: U Myntri Sorkar Pdeng ba dei khmih ia ka tnad Civil Aviation, Kinjarapu Rammohan Naidu, uba la wan jngoh ia ka jylla Meghalaya mynta ar sngi, u la leit iashim bynta ha ka jingpyni ia ka liengsuin kaba lah ban pynher na ki jaka shongum, kaba la pynlong ha Pung Umiam, Ri Bhoi Distrik mynta ka sngi bad u la iaroh bha ia ka jingitynnad ka Meghalaya, kaba tip kum ka “abode of clouds” ha ka ktien phareng. U la iashim bynta ha kane ka kam mynta ka sngi ha ka jingiadonlang u Myntri Rangbah ka Meghalaya, Conrad K Sangma.
Ha ka jingai jingkren, u Myntri Sorkar Pdeng u la ai jingsngewnguh ia u Myntri Rangbah ka jylla Meghalaya uba la plie lad ia kane ka kam mynta ka sngi bad u la kdew sha ka jingkongsan jong kane ka jingpyni mynta ka sngi kum ka jingjop ha ka teknoloji bad ka bynta jong ka jing thmu ka India na ka bynta ki lad pyniasoh.
Ha ka jingkren shaphang ka jingpyndonkam nyngkong u Myntri Rangbah Duh, Narendra Modi ia ka liengsuin kaba lah ban pynher na ki jaka shongum ha u snem 2000 na u mot Statue of Unity sha Ahmedabad, u Myntri u la ong ba kane kam dei tang ka jingpynher liengsuin kum ka dak hynrei ka dei ruh ka khubor kaba khlain shaphang ka jingiatylli bad ka jingplie lad. U Myntri u la ong, “Ki liengsuin kiba long ban pynher na ki jaka shongum ki don ka lad kaba kyrpang ban pyniasoh ia ki jaka ba jynjar ban poi, kyntiew ia ka kam jngoh kai, bad kyntiew ia ka ioh ka kot ha ki thain bapher bapher jong ka ri. Kane ka jingpyni mynta ka sngi ka long ruh ka dak jong ka jingiatreilang hapdeng ka Sorkar Pdeng bad ka Meghalaya hapoh ka jingialam jong u Myntri Rangbah Conrad Sangma.”
Ha ka jingai jingkren, u Myntri u la batai shaphang ki sienjam ba thymmai ban plie lad ia ka jingpynher ia kine ki jait liengsuin hapoh ka skhim UDAN kaba peit kyrpang ia ka jingpynher ia ki liengsuin na ki jaka shongum. Lyngba ki kyndon ba thymmai kiba plie lad ia ka jingiaid ryntih ki kam, ba kynthup ka jingai permit ia ki nongpyniaid ia kane ka kam bad ka jingpynduh ia ki water license ha ki kad liengsuin ha ki jaka shongum, ka Tnad ka thmu ban pynlong ba ka kam pynher liengsuin na ki jaka shongum ka don ka bynta kaba heh ha ki kam pynher liengsuin jong ka India.
Shuh shuh, u Myntri u la ban jur halor ka lad ia kine ki jait liengsuin ba kin kyntiew ia ka kam jngoh kai, khamtam ha Meghalaya. “Namar ka jingitynnad ka Meghalaya, ka jingpyniasoh lyngba kine ki jait liengsuin ka lah ban khring ia ki nongjngoh kai na India bad na kylleng ka pyrthei bad kane kan pynkylla ia ka kam jngoh kai ha ka jylla,” u la ong.
Da kaba pynianujor ia ki lad jong ka India bad ki ri kiba la pynskhem ia ka kam pynher liengsuin na ki jaka shongum kum ka Maldives bad Canada, ha kaba da ki hajar ngut ki nongleit nongwan ki ioh jingmyntoi na ka kam pynher lienguin na ki jaka shongum man u snem, u Myntri u la ong ba u ngeit skhem ha ka jinglah ka India ban tei ia ka kam pynher liensuin na ki jaka shongum kaba seisoh. Ka Tnad ka dang trei ban wanrah ia ki jingiatreilang bad kito kiba hakhmat ha kane ka kam bad ki Sorkar jylla, da kaba kyrshan ia ka jingpynbun ia ki lad pynher liengsuin na ki jaka shongum lyngba ka jingkyrshan pisa bad ka jingkyrshan ha ki kam teknikal.
U Myntri u la kdew sha ka jingjrong ka jaka pud duriaw ha India bad ka jingbun ki wah bad ki pung kiba plie ia ka lad kaba kyrpang na ka bynta ka kam pynher liengsuin na ki jaka shongum ha ka ri. Ka jingwanrah ia ka Viability Gap Funding (VGF) hapoh ka RCS sha ka kam pynher liensuin na ki jaka shongum kan ai jingiarap ia kito kiba pyntrei ia kane ka kam, u la ong. U la kyntu ia ka sorkar bad kiwei kiwei ki jylla ka thain shatei lammihngi ba kin wan shakhmat bad shim ia ki jingmyntoi jong ka jingpynher liengsuin na ki jaka shongum ha ki jylla jong ki.
U Myntri u la pynbna ruh ia ki jingthmu ban iatreilang bad ki nongshna tiar ka India kum ka HAL bad ka Mahindra Aerospace ban kyntiew ia ka jingpynmih ia kine ki jait liengsuin. “Ngi thmu ban pynlong ba ka India ka lah ban pyndap ia la ka jingdonkam ha ka jingshna ia ki leingsuin ba lah ban pynher na ki jaka shongum, ka jingplie lad ioh kam bad ka jingkyntiew ia ka jingsaindur thymmai ha ki kam pynher liengsuin,” u la ong.
Ha kawei ka liang pat, u Myntri u la kren shaphang ka jingiadei kaba jan jong ka longiing jong u bad ka longiing u Myntri Rangbah, da kaba kdew ba ki kpa jong ki ki la iatrei lang ha ka Iing Dorbar thawain Parliament bad kiba la ieng skhem lang na ka bynta ka jingkiew shaphrang jong ka ri. U la ong ba ka tnad ka kyrshan ia ka kam ba dang iaid shakhmat ban kyntiew ia ka kad liengsuin ha Shillong bad Tura ban kyntiew ia ki lad ka leit ka wan jong ka Meghalaya lyngba ki liengsuin.
Ka jingpyni mynta ka sngi ia ka jingpynher ia kane ka liengsuin ka dei da ka nongshna DeHavilland na Canada. U Myntri u la iaroh ia ka jingskhem jong kane ka liengsuin bad u la ong ba kane ka dei ka liengsuin kaba lah ban pynher ruh na ka khyndew, ka jaka shongum bad kiwei kiwei ki jait jaka ba bun jingjynjar. “Ki lad kiba don ban pyndonkam ia kane ka liengsuin ki long kiba bun, ka shong ha ka jingstad jong phi haba phi jied nangno phi kwah ban pynher bad hangno phi kwah ban hiar,” u la ong.
U Myntri un iashim bynta ruh ha ka 6th Helicopters & Small Aircraft Summit kaba pynlong ha Shillong da ka Tnad Civil Aviation (MoCA), jong ka Sorkar India ha ryngkat ka jingkyrshan jong ka Sorkar Meghalaya bad ka jingiatreilang bad ka Pawan Hans Ltd. & FICCI.
Ha ka 15 tarik u Naiwieng, u Kinjarapu un bteng ia ki kam da kaba iashim bynta ha ka 2nd North East Aviation Summit bad ki jingrakhe Janjatiya Gaurav Divas ha ka State Central Library ha Shillong.
Ha kane ka prokram ha ka Pung Umiam, la wan iashim bynta lang da u Symbud Myntri Rangbah ka Meghalaya, Bah Sniawbhalang Dhar, MLA Umroi Bah Damanbait Lamare bad kiwei kiwei ki ophisar na ka Sorkar Pdeng bad ka Sorkar Meghalaya.
Shong liengsuin duriaw lang u Myntri Kinjarapu ha Umiam bad u Conrad
