Shillong: U President ka NEHTA u Prof. Lakhon Kma ula ther ia ka sorkar jylla ba kam khein snep ia ka jingiakhih jong ki samla pule, ki nonghikai ka NEHU namar ba lehsei ki iasngewthuh jingmut bad ka sorkar pdeng kaba ialam ka BJP.
Haba kren mynta ka sngi, u Prof. Kma ula ong ba ka jingiakhih ki samla pule ka NEHU bad kiwei pyrshah ia ka jingleh u Vice Chancellor ka la long kaba jur bha hynrei ka sorkar jylla kam nud ban shim ia kano kano ka rai hynrei ka shu leh tang ban pynsngewbha ia ka sorkar pdeng. U la ong ba kat kane ka jingpynjynjar u Vice Chancellor, hynrei ym lah sngewthuh shuh ha kano ka dur kila iashah ia u ha jaka ban shu bret na kane ka jylla sha ka shnong kaba u wan.
U la ong ba kine ar ngut kiba la shah thung kum ki Pro Vice Chancellor ka la dei ban sngewthuh ba ka jingthung ka la dier por ban thung da une u Vice Chancellor, namar ba lada donkam, u Acting Vice Chancellor u lah ban thung ym ban thung da u Vice Chancellor u Prof. Prabha Shukla Shankar.
U la ong ba ki nonghikai kim dei ban shah pyndonkam bakla kum ki atiar ban iada ia u Vice Chancellor namar ba ki samla pule, ki nonghikai ki iakhih ym ba kwah ia ki Pro Vice Chancellor.
Ha kajuh ka por, u la ong ba mynta lashai kdar ba ki nonghikai, ki samla pule kim donkam shuh ia u Vice Chancellor bad ha kano ka rukom u treikam na jngai.
Imat ka sorkar jylla ka iasngewthuh jingmut bad ka sorkar pdeng, ther u Prof. Kma
